Plenária Parlamentu Nasionál. Imajen Tatoli/António Gonçalves

DILI, 11 agostu 2020 (TATOLI)—Parlamentu Nasionál (PN), ohin, aprova ona votu konfirmasaun ba deklarasaun Estadu Emerjérsia (EE) ho rezultadu votasaun a-favór 40 kontra 0 no abstensaun 17 ne’ebé ezerse hosi Bankada CNRT.

Notísia Relevante: Ohin, PN halo votu konfirmasaun ba deklarasaun EE

“Ho nune’e votu konfirmasaun hosi Parlamentu Nasionál konfirmadu,” Prezidente Parlamentu Nasionál, Deputadu Aniceto Longuinhos Guterres Lopes anunsia hafoin votasaun liuhosi plenária, tersa ne’e.

Prosesu votasaun ba votu konfirmasaun ne’e ho votasaun nominal bazea ba Rejimentu Parlamentu Nasionál artigu 71.

Iha loron 5 agostu 2020 liubá Parlamentu Nasionál autoriza Prezidente Repúblika dekreta Estadu Emerjénsia liuhosi projetu deliberasaun númeru 8/V/2020, 5 agostu aprovadu ho rezultadu votasaun a-favór 20, kontra 0 no abstensaun 0.

Iha lei autorizasaun hosi Parlamentu Nasionál hamutuk artigu 8 komposta hosi artigu 1 (konfirmasaun deklarasaun estadu emerjénsia), artigu 2 ko’alia kona-ba konfirmasaun autorizasaun, artigu 3 ko’alia kona-ba ámbitu territorial, artigu 4 ko’alia kona-ba durasaun estadu emerjénsia, artigu 5 kona-ba espesifikasaun ba direitu sira iha estadu emerjénsia.

Nune’e mós artigu 6 ko’alia kona-ba garantia direitu sidadaun sira, artigu 7 ko’alia kona-ba órgaun soberania no artigu 8 ko’alia kona-ba foro sivíl ne’ebé asesu ba tribunál no Provedór Direitu Humanu no Justisa (PDHJ).

Reprezentante Bankada Partidu Libertasaun Populár (PLP), Deputadu Abel Pires, hateten autorizasaun ne’ebé Komisaun Permanente hala’o tiha semana kotuk hodi autoriza Prezidente Repúblika dekreta Estadu Emerjénsia pertinente hodi halo prevensaun ba moras COVID-19 iha Timor-Leste.

“Tanba ne’e bankada PLP hato’o nia apoiu másimu iha situasaun ida-ne’e, atu nune’e moras ne’e labele tama mai Timor-Leste. Mai ita hotu-hotu fó apoia ba Ministériu Saúde, katak uza nafatin máskara no parte seguransa haforsa nafatin seguransa,” nia dehan liuhosi plenária, tersa ne’e.

Xefe Bankada Kmanek Haburas Unidade Nasionál Timor Oan (KHUNTO), Deputada Olinda Guterres, dehan oras ne’e mundu risku boot ba COVID-19 no Timor-Leste iha kazu pozitivu ida.

“Ne’e hatudu katak ita tenke prepara-aan molok moras ne’e afeta ita, tanba ne’e presiza medida nesesáriu no rigorozu ne’ebé sei implementa hosi autoridade defeza no seguransa. Rekomenda ba Primeiru-Ministru, Taur Matan Ruak, atu halo koordenadasaun di’ak hosi nasionál, munisípiu no postu administrativu sira nune’e liña servisu bele la’o ho efetivu hodi kombate surtu COVID-19,”  dehan Xefe Bankada KHUNTO ne’e.

Xefe Bankada CNRT, Deputadu Duarte Nunes, haktuir iha EE datuluk Bankada CNRT fó apoia tomak maibé preokupa kapasidade kontrolu ema tama mai territóriu Timor-Leste.

Nia dehan, la’ós bankada CNRT lakohi aplika Estadu Emerjénsia maibé presiza buka dalan seluk ho aplika situasaun sira hanesan kalamidade.

“Ami hakarak fó hanoin presiza hamosu lei ida ba situasaun ida bainhira Estadu Emerjénsia ida-ne’e hotu. Ita hotu hatene katak Indonézia, Austrália aumenta la’ós iha ita-nia laran maibé ita presiza hametin liu iha ita-nia fornteira rai, tasi no lalehan. Dalaruma ita la sukat ho ita-nia kapasidade atu kontrola. Katak, ema hira mak tama nune’e ita bele kontrola tuir estandarte internasionál,” Xefe Bankada CNRT, Duarte Nunes hateten.

Bankada CNRT propoin teste ba ema tama mai ne’e halo kedas iha fronteira molok autoriza ema ne’e tama mai territóriu Timor-Leste.

Deputada Bankada CNRT, Carmelita Caetano Moniz sekunda, loloos ne’e Prezidente Repúblika promulga mak Lei Protesaun Sivíl ne’e, lalika to’o Estadu Emerjénsia.

“Lei Protesaun Sivíl mai parlamentu ho karáter urjénsia, ha’u-nia hanoin lei ne’e serve atu rezolve situasaun. Tanba, iha lei ne’e iha etapa tolu (3), alerta, kontijénsia no kalamidade,” Deputada Carmelita Caetano Moniz, fó hanoin ne’e liuhosi plenária estraordinária, ohin.

Xefe Bankada FRETILIN, Deputadu Francisco Miranda Branco dehan, Komisaun Permanente foti desizaun atu salva ema hotu nia vida nunka bele krime.

“Ohin, ita halo konfirmasaun ba votu ne’ebé Komisaun Permanente deisde liuhosi rezolusaun Nú 8/2020 iha loron 5 fulan agostu tanba ho razaun moras ne’e iha viziñu kontinua aumenta. Tanba ne’e, Estadu Emerjénsia hodi fó biban ba Governu hodi atende ema sira-ne’ebé tama mai territóriu Timor-Leste nian,” Xefe Bankada FRETILIN hateten.

Bankada FRETILIN husu Governu atu investiga didi’ak ema sira-ne’ebé tama mai hosi Korea no nasaun seluk iha loron 05 agostu liu ba ne’e.

Xefe Bankada Partidu Demokrátiku (PD), Deputadu António da Conceição, hateten aplikasaun Estadu Emerjénsia hodi nune’e COVID-19 labele tama Timor-Leste.

“Ha’u hanoin aplikasaun Estadu Emerjénsia hodi halo buat di’ak ba ita-nia rain, tanba ne’e bankada PD konsidera saúde públika importante. Kestaun ida-ne’ebé ema hotu tenke preokupa tanba moras ne’e da’et ba mundu tomak. Ita haree mundu tomak nia reasaun, ita hotu-hotu konsiente katak moras ne’e seidauk iha aimoruk atu kura,” nia dehan.

Bankada PD husu Emabaixada sira atu identifika estudante sira-ne’ebé ho voluntariamente hakarak fila mai Timor-Leste.

Purtantu Xefe UDT/FM, Deputadu Francisco David Carlos, husu ema hotu-hotu tenke hamutuk hodi luta kontra surtu COVID-19 ne’ebé oras ne’e kontinua afeta mundu, tanba ne’e Timor-Leste tenke preokupa ho situasaun ne’e.

Xefe Bankada PUDD, Deputadu António de Sá Benevides, hato’o apresiasaun ba Governu ne’ebé iha vontade atu kombate surtu COVID-19.

“Aleinde COVID-19, ha’u fó hanoin ba Ministériu Saúde fó atensaun ba moras Dengue, TBC no moras sira seluk,” nia hatetrn. 

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here