Ministra Saúde, Odete Maria Freitas Belo. Imajen Tatoli/Egas Cristovão

DILI, 11 agostu 2020 (TATOLI)—Ministra Saúde, Odete Maria Freitas Belo, fó-sai katak pagamentu ba otél sira iha Dili laran finaliza ona no oras-ne’e preparadu ba implementasaun Estadu Emerjénsia dala ida-ne’e tan. 

Ministra Saúde Odete Maria informa, orsamentu ne’ebé mak aloka ba Ministériu Saúde iha millaun $49 durante aplikasaun estadu emerjénsia.

“Ita laiha problema ho otél sira-ne’ebé mak ita aluga tanba otél sira-ne’e ita halo ona pagamentu. Pagamentu ne’ebé ita halo ho otél sira no catering sira-ne’e kuaze ita halo hotu ona. Tanba ne’e mak iha semana kotuk ita simu tán ita-nia sidadaun sira, nune’e mós sidadaun estranjeiru sira ho númeru ne’ebé mak aas tebes, kuaze 400 pesoas ne’ebé mak tama iha semana kotuk,” Odete Maria informa liuhosi plenária, Parlamentu Nasionál, tersa ne’e.

Nia dehan, kuarentena ne’ebé mak iha labele akomoda ema hotu-hotu tanba laiha espasu ne’ebé sufisiente.

Ministra Saúde ne’e fó intrusaun ba pesoál no diretór sira atu estuda problema sira-ne’ebé mosu iha implementasaun Estadu Emerjénsia durante fulan-tolu liubá, nune’e ba EE dala ida-ne’e labele iha tán problema dokumentu ho otél sira.

“Agora daudaun ita prepara hela dokumentu nune’e depois loron 14 ne’e ita tenke halo kedas ba pagamentu ba sira kona-ba hahan ne’ebé otél sira oferese ne’e tenke selu kedas,” nia dehan. 

Iha parte seluk, Ministra Saúde ne’e informa ba deputadu katak ekipamentu hanesan máskara, oklu, roupa ne’ebé mak sira hatais no ventiladór simu ona hosi UNDP.

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here