Prezidente Autoridade Munisípiu Dili, Gaspar Soares hala’o enkontru ho ekipa liña ministériu, Ministériu Saúde, no Komandu Polísia Munisípiu Dili hodi buka solusaun, oinsá muda mentalidade sosiedade kumpre regra Estadu Emerjénsia (EE) ba dahaat. Imajen/Eugénio Pereira

DILI, 11 agostu 2020 (TATOLI)- Ekipa liña ministériu ne’ebé lidera husi Ministériu Saúde, ohin, hamutuk ho Autoridade Munisípiu Dili no Komandu Polisia Munisípiu Dili hala’o enkontru koordenasaun hodi buka solusaun, oinsá muda mentalidade sosiedade Timor-Leste atu kumpre regra implementasaun Estadu Emerjénsia (EE) ba dahaat.

Notísia Relevante : Deklarasaun EE tanba númeru kazu COVID-19 iha nasaun viziñu aumenta

 Diretora Servisu Saúde Munisípiu Dili, Agostinha Segurado dehan, enkontru atu alerta informasaun prevensaun surtu COVID-19 ba sosiedade, liuliu kapitál Dili atu kumpre regra EE.

Ekipa mós sei halo vizita ba eskola hotu iha Dili no koordena ho autoridade suku, lider relijioza, too universidade sira atu halo nafatin prevensaun hodi livre husi ameasa peste letál COVID-19.

“Enkontru koordenasaun ne’e halo oinsá atu kontinua nafatin halo sensibilizasaun informasaun ba públiku hodi mantein halo sira nia atividade, maibé kumpre nafatin regra saúde nian,” dehan Agostinha Segurado, ba jornalista iha salaun enkontru Sentru Vera Cruz, Dili.

Ministériu Saúde rasik hosu kolaborasaun Prezidente Autoridade Munisípiu Dili, Gaspar Soares no Administradór Postu Atauru, Metinaro, Vera Krús, Kristu Rei,  Don Aleixo no Nain Feto, atu aviza nafatin ba populasaun hapara provizóriu atividade festa,  kumpre regra fase-liman beibeik, kontrola distánsia sosiál no hapara atividade futu-manu, jogu desportu sira.

Diretora ne’e rekoñese fasilidade saúde públiku ne’ebé Ministériu Saúde ho Organizasaun Mundiál Saúde (OMS) monta iha kapitál Dili barak maka abandona, tanba ema la uza hodi fase-liman.

“Ita haree fasilidade saúde barak ema abandona, ema la fasi-liman, entaun sasán sira ne’e rai hanesan amostra de’it, tanba ne’e ita hosu atu sosiedade muda sira-nia mentalidade kumpre nafatin regra ne’e,” nia apela.

Iha parte seluk, reprezentante Ministériu Saúde Departamentu Promosaun Saúde ka Pilar II COVID-19, Misliza Vital rekoñese sosiedade kapitál Dili maioria la kumpre regra atu uza máskara, fase-liman iha fatin públiku ne’ebé ekipa prepara ona bee no sabaun, inklui la kumpre regra distánsia sosiál.

Nia dehan, agora Ministériu Saúde fó sai ona desizaun atu ekipa kontinua halo diseminasaun informasaun no sensibilizasaun informasaun ba média imprime, televizaun, radio no fasilidade públiku hanesan, saúde, eskola, Igreja, Meskita, supermerkadu too kioske ki’ik sira.

Misliza hatutan, semana ida, ekipa sei fó sai informasaun ba média dala-tolu hodi atualiza informasaun kona-ba situasaun sosiedade sira ne’ebé hela iha fatin kuarentena kapitál Dili too munisípiu sira.

Pontu importante seluk tan maka, ekipa Pilar II COVID-19 sei halo monitorizasaun ba fatin sanitaria fas- liman nian ne’ebé tau iha fatin dala barak bee ne’e sosiedade sira la uza fase-liman hodi halo bee sai merak no ekipa Saneamentu Munisípiu Dili la ba enxe ka troka bee.

“Importante liu maka ne’e, ita nunka halo monitorizasaun ba bee ne’ebé tau iha fatin públiku. Ema uza fase liman ka lae? serake ida ne’e hanesan amostra de’it, ida ne’e mak ita tenke monitoriza hodi muda konsiénsia sosiedade atu kumpre regra,” nia hateten.

Ministériu Saúde mós hasai ona karta sirkulár ida hodi husu ba loja no supermerkadu sira hanesan, Timor Plaza, Mei Mart, W-Four too munisípiu sira hodi fó sai mensajen prevensaun COVID-19.

Ema millaun 20 sofre COVID-19

Koordenadór Pilar III COVID-19 Ministériu Saúde, Doutora Josefina Clarina João informa, tuir dadus mundiál númeru COVID-19 afeta ona ba ema millaun 20 no barak maka mate ona.

Nia hatutan, mezmu implementasaun EE dahaat númeru COVID-19 iha Timor-Leste foin rejista pasiente ida no ema kuaze 300-liu maka kumpre hela kuarentena. Maibé Timor-Leste tenke kuidadu-an, tanba COVID-19 númeru sa’e maka’as iha nasaun viziñu Indonézia.

 Prezidente Autoridade Munisípiu Dili, Gaspar Soares dehan, nia parte kontinua koopera ho Segundu Komandante PNTL Munisípiu Dili, Superindente Euclides Belo, hodi halo operasaun no kontrolu másimu sosiedade iha Dili  hodi kumpre regra saúde nian.

Iha parte seluk, Segundu Komandante PNTL Munisípiu Dili, Superindente Euclides Belo deklara, PNTL loron-loron halo auto stop ba sosiedade sira ne’ebé hala’o movimentu tenke uza máskara no karreta sira tula pasajeiru ka família tenke kumpre regra distánsia sosiál.

Euclides rekoñese implementasaun EE ba dahaat agora sosiedade barak maka dezobediénsia hodi lakohi kumpre regra EE.

Nia hatutan, bainhira sosiedade sira la kumpre PNTL sei halo atuasaun kaptura hatama ba kadeia.

Parte seluk, PNTL Dili sei koordena nafatin ho ekipa Mama Bolu sei lori ai-moruk dezinfeta ba rega iha edifísiu, eskola no fatin públiku no transporte públiku hodi prevene sosiedade husi risku COVID-19.

“Ami PNTL prontu koopera nafatin hodi halo asaun koordena ho ekipa hotu-hotu sedu ka tarde ita tenke implementa ona meius kontrolu servisu implementasaun EE ne’e ba sosiedade ne’ebé la kumpre ita sei atua ho lei,” nia hateten.

Nia hatutan, PNTL mós sei halo kontrolu ba atividade públiku hanesan, futu-manu, atividade bola guling, festa no atividade misa sira tenke fase-liman no kontrolu distánsia sosiál.

Ekipa diskute mós atividade aprendizajen eskola balun too agora seidauk bele reativa, tanba sei menus fasilidade saúde nian no la iha bee-moos.

Iha Postu Administrativu Atauru rasik rejista eskola hamutuk 25 no eskola 15 maka kumpre  ona regra hodi reativa atividade aprendizajen.

Iha Postu Administrativa Kristu Rei, Eskola hamutuk 52 reativa ona, Postu Administrativu Don Aleixo Eskola 68 reativa ona 59 falta eskola 9, Postu Administrativu Vera Cruz totál eskola 15 maka reativa ona, Postu Administrativu Nain Feto eskola 18, Postu Administrativu Metinaro eskola 11 no Munisípiu Dili totál eskola 192, reativa ona 143 no seidauk reativa 49.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here