DILI, 11 agostu 2020 (TATOLI)—Ministru Finansa, Fernando Hanjam, informa VIII Governu Konstitusionál ezekuta ona 54% hosi orsamentu ne’ebé espesífika ba fundu COVID-19.
Notísia Relevante: PN kontinua preokupa ba ezekusaun fundu COVID-19
“Ha’u atu informa ezekusaun orsamentu relasaun ho fundu COVID-19 nian to’o data ohin ita ezekuta ona 54%, ezekusaun hosi primeiru pedidu levantamentu ho orsamentu $150 no segundu levantamentu nian ho orsamentu $70,” Ministru Finansa, Fernando Hanjam, informa liuhosi diskusaun votu konfirmasaun, iha plenária Parlamentu Nasionál, tersa ne’e.
Nia haktuir, durante ne’e Ministériu Finansa halo avaliasaun ba ministériu sira-ne’ebé la konsege implementa fundu COVID-19 ne’e no hosi avaliasaun konsege poupa orsamentu balun.
“Orsamentu sira-ne’e ita tenta halo poupansa no ita hetan kuaze millaun $30. Agora relasaun ho pagamentu ba subsídiu ba funsionáriu sira hanesan PNTL no F-FDTL ita finaliza ona maibé sei tama tán proposta balun nune’e ita bele halo pagamentu kona-ba subsídiu remuneratóriu ne’e,” nia dehan.
Ba parte saúde nian, nia hateten, tama tán proposta rua maibé protesaun sivíl no bombeiru sira, la kleur tan EDTL mós finaliza ona maibé ba jornaista sira mak sei trata hela rejime legál.
“Agora daudaun EDTL ita haree ona no lakleur ita bele finaliza ona. Kona-ba jornalista sira maibé sira kuandu funsionáriu públiku hanesan TVTL ne’e, ita bele halo pagamentu. Agora sira-ne’ebé la’ós funsionáriu públiku, ita trata hela nia rejime legál depois ita bele halo pagamentu ba sira-nia direitu,” nia dehan.
Jornalista : Evaristo Soares Martins
Editór : Cancio Ximenes
