Ekipa F-FDTL ajuda populasaun defisiénsia sira hodi fó tratamentu saúde iha Krarás-Viqueque. Imajen/F-FDTL.

DILI, 11 agostu 2020 (TATOLI)- Komandu FALINTIL-Forsa Defeza Timor-Leste (F-FDTL) liuhusi Departamentu Saúde koopera ho ekipa Ministériu Saúde hala’o tratamentu saúde gratuita ba populasaun Krarás, Munisípiu Viqueque.

Notísia Relevante : F-FDTL presta omenajen ba eroi no apoia ai-han ba povu Manufahi

Xefe Estadu Maiór Jenerál F-FDTL, Major Jenerál  Lere Anan Timur deklara asisténsia saúde gratuita ne’e halo hodi tulun saúde populasaun sira iha área remota ne’ebé dook husi sentru saúde.

Lere rekoñese katak, durante funu tinan-24 nia laran, soldadu FALINTIL barak mós sofre kanek tanba hetan tiru husi inimigu, nune’e iha selebrasaun FALINTIL ba tinan-45 (20 agostu 1975-20 agostu 2020), Komandu F-FDTL ho membru 400-resin halo tour FALINTIL ba munisípiu hodi buka ajuda fali povu ne’ebé moris iha situasaun mukit.

Durante vizita ba Krarás-Viqueque, Komandu F-FDTL fahe foos no mina ba família uma-kain-40 ne’ebé konsidera moris mukit liu.

Komandante Lere fó lembra katak, Masakre Krarás ne’ebé komete husi Militár Indonézia no membru hansip balun hodi oho ema liu na’in-200, iha agostu 1983 halo Krarás koñesidu ho naran ‘suku janda’ ka “suku faluk”.

“Krarás nu’udar masakre boot ida ne’ebé TNI oho ita nia maun-alin no inan-feto sira barak iha ne’e, tanba ne’e parajen tour FALINTIL mai too iha fatin masakre ne’e mai hodi presta mós omenajen ba fatin ne’e no halo mós tratamentu saúde ba povu sira, tanba sira nu’udar vítima ba funu naruk ne’e,” dehan Lare Anan Timur ba populasaun sira, ohin.

Tuir istória ne’ebé Agênsia Tatoli asesu hahú husi 1978 too 1979, povu hirak ne’ebé hela iha Suku Bibileo hela dook tebes husi militár Indonézia nia kontrola. Tan ne’e iha 1979, povu hirak ne’ebé hela iha Bibileo hetan kapturasaun husi militár indonézia ne’ebé re-aloka tiha sira ba Viqueque. Iha tinan 1981, povu hirak ne’e dezloka fila-fali hodi hela metin iha parte norte Viqueque nian ne’ebé ho naran Krarás.

Bainhira Militár Indonézia sira kontrola rejiaun ne’e sira hetan ajuda husi grupu rua husi Milisia Timoroan sira. Grupu ida-uluk mak Hansip sira, ne’ebé hetan kilat no osan husi militár Indonézia. Grupu da-ruak mak ne’e Ratih (Rakyat Terlatih) ne’ebé la hetan osan no kilat.

Iha inísiu 1983, militár Indonézia deside atu hatún nivel hansip sira nian balun nian ba Ratih iha rejiaun ne’e. Maibé, Ratih sira lakohi atu entrega sira-nia kilat no deside hamutuk ho FALINTIL pro-independénsia sira.

Tanba hirus no nervus kontra okupasaun Indonézia ne’ebé akumula husi asédiu sexual kontra feto maluk sira husi militár Indonézia sira.

Iha agostu 1983, militár Indonézia iha Krarás hetan ataka husi FALINTIL no membru eis- Ratih sira. Soldadu Indonézia hamutuk na’in-14 mak mate iha ataka ne’e. Husi ne’e, abitante iha Krarás sira mós halai husik sira-nia hela fatin no ba subar iha foho sorin-sorin, ta’uk hetan ataka fila fali husi Indonézia sira.

Iha setembru 1983, militár Indonézia tama Krarás, sunu uma sira no oho ema na’in haat ka lima ne’ebé la halai inklui ferik ida. Hafoin ne’e, militár Indonézia sira ba buka tan hirak ne’ebé subar iha foho sorin-sorin. No hirak ne’ebé kaer kona, militár Indonézia sira lori sira ba tau fali iha Viqueque.

Iha 16 setembru 1983, soldadu Indonézia no membru hansip sira foti ema ho idade entre tinan-18 no tinan-55 husi hirak ne’ebé uluk hela iha Krarás no lori ba kuak ida iha suku Caraubalu no oho sira hotu.

Iha 17 setembru 1983, militár Indonézia sira hetan tan ema balun hirak ne’ebé uluk hela iha Krarás ne’ebé balun halai ba subar iha Buikarin. Militár Indonézia sira foti liuliu mane sira ba Tahubein no oho sira hotu, oho hamutuk ema na’in-141.

Iha parte seluk, Xefe Estadu Maiór Jenerál F-FDTL, Lere Anan Timur apela ba veteranu Munisípiu Viqueque atu labele hadau malu projetu eletrisidade hodi impede naroman eletrisidade ba povu nia uma.

“Ita fatin hotu- hotu veteranu sira mak hadau malu projetu, tanba de’it ema ida rua nia hahalok ahi labele lakan iha fatin hotu-hotu,” Lare hateten.

Lere dehan, tuir loloos veteranu sira maka tenke sai mata dalan atu ajuda povu liberta povu tuir prinsípiu luta nian.

Parte seluk, Lere apela nafatin ba juventude Viqueque  atu kria nafatin dame hodi lori nasaun ne’e labele monu ba dezastre hodi hamutuk kontribui ba dezenvolvimentu.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here