DILI, 10 agostu 2020 (TATOLI)-Tribunál Distritál Dili (TDD), ohin, aplika pena multa $120.00 ba arguidu ho inisiál JS tanba komete krime ofensa integridade fízika simples hasoru lezada MP.
Juis singular Ivan Suritai hateten, liuhusi produsaun prova durante julgamentu iha duni faktu ne’ebé provadu katak arguidu iha akontesimentu iha merkadu Becora iha tinan 2019 mosu diskusaun entre arguidu ho lezada, nune’e la simu malu ho liafuan no nervozu arguidu baku lezada ho konsekuénsia ne’e lezada sente moras iha isin.
Tribunál kondena arguidu ho krime ofensa ba integridade fízika simples iha artigu 145, númeru 1 iha kódigu penál ne’ebé hateten, se mak ofende ema seluk nia isin ka saúde sei hetan pena prizaun to’o tinan-tolu (3) ka multa. Tanba ne’e tuir entendimentu Tribunál nian deside aplika pena multa ba arguidu kada loron sei selu ho valor $1.00 durante loron 180.
Bainhira arguidu la kumpre desizaun Tribunál nian mak sei hetan pena prizaun durante loron-80. Kazu ne’e rejista ho númeru nuc:222/11/DBCR.
Jornalista : Nelson de Sousa
Editór : Francisco Simões
