Ministra Saúde , Odete Maria Freitas Belo. Imajen Tatoli/Egas Cristovão

DILI, 10 agostu 2020 – Ministra Saúde, Odete Maria Freitas Belo, hatete pasiente pozitivu Covid-19 ne’ebé halo hela tratamentu iha fatin izolamentu, Vera-Cruz, presiza halo tan teste ba daruak hodi konfirma rezultadu sei pozitivu ka negativu ona.

“Sidadaun ida pozitivu COVID-19 ne’e nia di’ak hela, laiha sintoma ruma no hein teste tuirmai hodi haree rezultadu sei pozitivu ka la’e”, haktuir governante ne’e ba jornalista sira iha Palásiu Governu.

Notísia Relevante: Timor-Leste rejista kazu foun ida ba COVID-19

Tuir Ministra, normalmente atu hatene loloos ema pozitivu livre ona husi virus ne’e tenke halo teste laboratóriu dala-tolu ho rezultadu negativu tutuir malu.

Governante ne’e afirma, teste ne’e analiza de’it iha laboratóriu nasionál, tanba ekipamentu prense ona halo teste, tanba husi laboratóriu Darwin, Austrália, rekoñese laboratóriu nasionál Timor-Leste nian bele ona halo teste no analiza rasik.

Kazu pozitivu COVID-19 ne’e afeta ba sidadaun estranjeiru ida hosi Indonézia, hafoin Timor-Leste livre hosi kazu Covid-19 iha fulan tolu nia-laran.

Governu liuhosi Ministériu Saúde rejista hikas kazu pozitivu COVID-19 iha loron 04 agostu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here