Hakerek nain, Alipio De Almeida (Médiku Veterinária).

Husi:

Alipio De Almeida

Moras African Swine Fever (ASF) ho sinonimu peste suina Africana; febre fahi afrikana; demam babi Áfrika.

Rezume istória moras ASF

Istorikamente, moras refere akontese dahuluk iha 1909, iha Áfrika Leste. Identifikadu dahuluk iha 1921 iha nasaun Kénia. Husi ne’ebá, moras ASF kontinua transmite ba rejiaun hotu iha Áfrika ne’ebá, kontinua ba Europa, tama Ázia no tuir mai to’o Ázia sudeste iha 2018, no finalmente kontamina ita nia rai doben Timor-Leste iha semana ikus fulan-setembru 2019 ne’ebé liuhusi ita nia Ministériu Agrikultura no Peska deklara virus ASF nia prezensa iha ita nia nasaun ne’ebé iha tempu ne’ebá hamate ita nia agrikultór nia fahi maizumenus pursentu 40 iha nia prezensa dahuluk.

Balada fahi nu’udar espésie ne’ebé ho valór signifikativu tebes ba ita Timoroan ne’ebé maioria Kristaun. Balada refere importante tebes, tanba bele utiliza ba seremonia sosiu-kulturál, prodús na’an, nu’udar prezente. Hakiak fahi mos nia vantajen nu’udar fonte rendimentu ida hodi suporta ekonomia família ninian.

Dezafiu hakiak fahi

Hakiak fahi iha vantajen oi-oin hanesan mensiona dau-daun iha leten, hakiak balada fahi mos hasoru dezafiu oi-oin. Husi dezafiu sira bai-bain ona (hanesan breeding, feeding, management), ikus-ikus ne’e, ema sira ne’ebé hakiak fahi hasoru problema boot ida konaba fahi ninia saúde liuliu tanba moras ASF. Hanesan ita barak lee no rona ona katak moras ida-ne’e akonese kleur ona iha mundu (mensionadu iha leten), maibé nu’udar moras foun ida ba Timor-Leste. Moras ne’e ita nia governu deklara nia ezisténsia iha fim setembru 2019.

Impaktu moras ASF ba balada fahi iha Timor-Leste

Bazeia ba dadus ne’ebé aprezenta husi Ministériu Agrikultura no Peska hatudu durante periódu fulan tolu nia laran hahú setembru to’o dezembru 2019, moras ASF hamate ona fahi ne’ebé agrikultór sira hakiak maizumenus 20,000 iha Timor-Leste. Númeru ida ne’e boot tebes no sai problema sériu no nu’udar dezafiu boot ba hakiak-nain sira. Taxa mortalidade ne’e kuaze refleta pursentu lima husi totál númeru balada fahi iha Timor-Leste tuir sensu uma kain 2015. Haree ba tempu ne’ebé badak no númeru mortalidade fahi ne’ebé aas tebes, hatudu moras ne’e perigu, kontaziozu no fatál tebes ba balada fahi doméstika ne’ebé agrikultór sira hakiak.

Saida mak ASF no  oinsá virus ASF hada’et ba fahi sira?

Moras ASF nu’udar moras virál ida kauza husi virus AFS ne’ebé fatal, perigu no kontajiozu tebes ba balada fahi maus no fuik. Hamosu; febre aas, haemorrhajia (mean) iha fahi nia kulit no organ internál sira no vontade han lakon iha fahi ho idade hotu-hotu.

Virus ne’e perigu tanba seidauk iha vasina no aimoruk hodi kura. Virus ne’e mos kontaziozu tanba nia hada’et lais tebes entre fahi iha fatin ida ba fatin seluk. Moras ASF mos fatál tanba hamosu taxa mortalidade aas tebes no bele hamate fahi hotu iha luhan ida nia laran. Sinál klínika sira inklui: mate derepente, muta, diárea bele kahur ho raan, me’ar, isin kulit mean no azul iha área tilun, inus. Isin lolon no kabun, dada iis araska, inus been, toba de’it no toba sena malu kuandu fahi barak iha luhan ida, abortu bai inan sira ne’ebé kabuk hela, no taxa mortalidade aas bele to’o pursentu 100.

Periodu inkubasaun ba moras ASF bele lori loron haat-19. Periodu ne’e bele menus husi loron haat kuandu ita nia fahi hetan númeru virus ASF barak tebes iha tempu badak nia laran no bele hamosu mate derepente.

Virus ASF hadaet liu husi dalan oioin, inklui  kontaktu direta entre  fahi ne’ebé moras hela ho fahi ne’ebé seidauk moras ka saudavel, virus ASF bele hada’et mos liu husi roupa no sasan ne’ebé kontaminadu, aihan restu husi dapur ne’ebé kahor ho na’an fahi kontaminadu ne’ebé mai husi fahi ne’ebé mate ka oho tanba moras ASF. Virus ASF mos bele hada’et liu husi bee ne’ebé kontamidadu, hahan restu ne’ebé kaur ona ho na’an fahi ne’ebé kontaminadu. Ikus liu, virus ASF mos bele hada’et liuhusi vektór biolojiku hanesan fahi nia kutun husi jenera Ornithoros, no vektor mekaniku hanesan susuk no lalar sira.

Oinsa ita  prevene ita nia fahi husi virua ASF?

Iha área ne’ebé livre ka área ne’ebé seidauk iha moras ASF, asaun ne’ebé ita tenke halo hanaran asaun biosiguransa atu evita virus ASF labele tanba ita nia fahi luhan. Asaun bioseguransa ne’e inklui:

  1. Bandu fahi no produtu fahi nian husi área afetadu atu tama ba ita nia fahi luhan;
  2. Bandu hahan fahi nian no sasan saida de’it maka iha relasaun ba balada fahi nian atu labele tama ba ita nia fahi luhan. Sasan sira ne’e inklui ita nia roupa, ema ne’ebé mai vizita ita, no kareta tula sasan kontaminadu sira;
  3. Bandu movimentu fahi, produtu fahi no sasan ne’ebé diskunfia afetadu atu labele tama ba ita nia fahi luhan ne’ebé identifikadu sei livre husi ASF, inklui mos roupa ne’ebé ita hatais ba ita nia fahi luhan tenke moos no rai iha fatin ne’ebé seguru.
  4. Hakiak ita nia fahi iha nia luhan, labele husik ita nia fahi livre atu labele hetan kontaktu ho fahi infektadu sira, sasan no ema sira ne’ebé kontaminadu ona;
  5. Hamoos ka fase ita nia fahi luhan atu moos nafatin no fó hahan di’ak de’it ba ita nia fahi;
  6. Halo tratamentu antiparazita regulár ba ita nia fahi hodi halakon fahi nia kutun;
  7. Labele fó han ita nia fahi ho hahan restu husi dapur no hahan ne’ebé foer no dois ona;
  8. Limita vizitante (ema no animal) sira ba ita nia fahi luhan;
  9. Kuida ita nia fahi atu labele hetan kontaktu direta ho fahi fuik sira no predatór sira ne’ebé karik hetan kontaktu ho fahi fuik infektadu;
  10. Karik hetan fahi maten ka kadaver ruma, ita tenke hakoi no labele soe arbiru atu ajente kauzativu iha kadaver ne’e labele kontamina ambiente, nune’e ajente moras iha kadaver ne’e labele da’et fali ba ita nia fahi.

Oinsá eradika moras ASF husi ita rai?

To’o loron ohin, seidauk iha vasina hodi halo vasinasaun kontra virus ASF. Seidauk mos iha aimoruk hodi halo tratamentu ba ita nia fahi sira karik afetadu husi virus ASF. Tanba ne’e, Stamping out mak meiu ida ne’ebé aplika dau-daun iha nasaun avansadu sira. Maneira aplikasaun metodu ne’e maka oho hotu fahi sira ne’ebé identifikadu pozitivu ba virus ASF no hakoi tiha.

Kontaktu ita nia tékniku pekuária no veterinária sira ne’ebé iha besik ita nia área, karik ita hetan fahi ruma ho sinál moras. Nune’e, tékniku sira kontinua hala’o sira nia atendimentu tuir mandatu ne’ebé sira hetan hodi prevene transmisaun ajente moras husi fahi refere ba fahi seluk iha fatin seluk.

Hakerek nain nu’udar Médiku Veterinária

E-mail: alipio.dealmeida@yahoo.com.au

Mobile: +670 78351616

Membru Asosiasaun Médiku Veterinária Timor-Leste (AMVTL)

HAKEREK NO HATÁN

Please enter your comment!
Please enter your name here