Diretora Jerál Prestasaun Servisu Saúde, Odete Viegas. Imajen Tatoli/Egas Cristovão

DILI, 10 agostu 2020 (TATOLI)-Koordenadora Jerál Komisaun Prevensaun COVID-19, Odete Viegas da Silva, informa pasiente COVID-19 foun ne’ebé daudaun ne’e hela iha sala izolamentu Vera Cruz Dili ninia kondisaun saúde komesa di’ak.

Pasiente konfirmadu ho tinan 45 husi Java Sentrál Indonézia ne’e laiha sintoma coronavirus hafoin hetan tratamentu saúde husi ekipa médiku sira.

”Pasiente COVID-19 ne’e daudaun kondisaun di’ak ona maibé bainhira lori nia ba izolamentu Vera Cruz nia sente hanesan anseadade maibé iha momentu ne’ebá médiku sira kontaktu kedas ho Embaixada Indonézia iha Timor-Leste oinsá bele fó akonselamentu ba nia to’o agora sintomas laiha ona,” dehan Odete ba jornalista sira iha sala Laboratóriu Nasionál HNGV, segunda ne’e.

Notísia Relevante :Timor-Leste rejista kazu foun ida ba COVID-19

Aleinde hetan moras coronavirus,  pasiente konfirmadu ne’e mós sofre problema tensaun aas tanba ne’e maka profisionál saúde sira kontinua fó tratamentu ba nia.

”Nia rekupera ne’e signifika la’ós nia atu sai husi sala izolamentu lae, nia rekupera ne’e hanesan isin manas mear laiha maibé sei nafatin iha sala izolamentu to’o teste dala rua tutuir malu negativu mak foin rekupera no sai husi sala izolamentu,” dehan Odete.

Notísia Relevante :Pasiente pozitivu COVID-19 foun izola ona iha Vera Cruz

Entretantu, Sidadaun mane ne’e maihusi Java Sentrál Indonézia  ho aviaun Citilink to’o iha Kupaun, Nusa Tenggara Timur (NTT) iha loron 21 fulan-jullu no iha loron 22 fulan hanesan tama iha territóriu Timor-Leste liuhosi fronteira terrestre Motain, Munisípiu Bobonaru.

Loron hanesan ekipa saúde lori kedas sidadaun ne’e hodi kumpre kuarentena obritatóriu iha Tasi-Tolu Dili.

Tuir dadus; ema na’in 105 maka la’o hamutuk ho pasiente konfirmadu ne’e bainhira tama mai territóriu TL iha fulan kotuk.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here