Parlamentu Nasional. Imajen Tatoli/Egas Cristovão

DILI, 09 agostu 2020 (TATOLI)—Komisaun F (Komisaun Saúde, Seguransa Sosiál no Igualdade Jéneru) iha Parlamentu Nasionál husu Governu liuhosi Ministériu Saúde atu kompleta nesesidade bázika iha saúde Munisípiu Manatuto hanesan rekursu umanu, transporte, karreta ambulánsia, medikamentu, rezidénsia no orsamentu nune’e garante saúde públika ba povu.

Tuir dokumentu fiskalizasaun ne’ebé TATOLI asesu ohin, haktuir komisaun F halo fiskalizasaun ba Munisípiu Manatuto iha loron 17 abríl 2020 liubá ho objetivu rekolla informasaun kona-ba ezekusaun orsamentu no programa anuál 2020 nian inklui fiskaliza medida prevensaun ba surtu COVID-19 iha munisípiu refere.

“Iha servisu saúde Munisípiu Manatuto hahú hosi sentru internamentu, sentru saúde no postu saúde sei falta ka menus profisionál saúde, pesoál limpeza, seguransa no pesoál administrasaun hodi reforsa prestasaun servisu no atendimentu saúde públika ba komunidade,” dokumentu ne’ebé asina hosi Prezidente Komisaun F, Deputadu Noé da Silva Ximenes no Deputada Helena Martins Belo ne’e haktuir.

Tuir dadus ne’ebé mak Komisaun F deteta hatudu katak profisionál saúde sira laiha transporte hanesan motorizada hodi apoia sira atu halo servisu ba komunidade. Bazeia ba observasaun katak motorizada sira-ne’ebé mak iha avaria hotu ona no presiza halo leilaun.

“Haree ba realidade hatudu katak karreta ambulánsia barak mak hetan avaria no la halo manutensaun regula hodi difikulta atendimentu ba pasiente sira no mós implementasaun programa saúde nian. Ezemplu, programa SISCA, Mobile Klinik, saúde ba família no kampaña sensibilizasaun ba komunidade relasiona COVID-19,” dokumentu fiskalizasaun hosi Komisaun F nian ne’e hateten.

Tuir relatóriu fiskalizasaun Komisaun F nian ne’e haktuir, iha sentru saúde no postu saúde balun falta aimoruk balun akontese stockout no aimoruk iha sentru balun la tuir pedidu ne’ebé sentru sira hato’o. Ida ne’e fó impaktu ba pesoál saúde hodi pasa reseita no pasiente tenke prefere ba munisípiu ka nasionál. 

Komisaun F mós nota, hela fatin ba profisionál saúde iha sentru no postu saúde sei mínimu tebes no rezidénsia balun tenke uza edifísiu postu saúde nian sai hanesan fatin rezidénsia.

“Alokasaun orsamentu hosi ministériu ba sentru saúde menus tebes, ida-ne’e difikulta servisu adminitrasaun sentru no postu saúde hodi bele halo akizisaun bens no servisu,” dehan Prezidente Komisaun F iha relatóriu fiskalizasaun ne’e.

Nune’e mós iha sentru no postu saúde seidauk hetan ekipamentu protesaun pesoál ba propagasaun surtu COVID-19.

Relatóriu fiskzalizasaun Komisaun F nian deskobtre, sentru internamentu presiza dezinfekta ida hodi tau permanente ka ekipa permanente ida hodi halo dezinfektan transporte públiku no privada ne’ebé mak movimenta iha sentru internamentu.

Ho preokupasaun hirak ne’e, Komisaun F ne’ebé lidera hosi Deputadu Noé da Silva “Buka Tuir” rekomenda ba Ministériu Saúde atu hala’o levantamentu ba númeru  profisionál saúde , pesoál servisu administrativu, pesoál seguransa no auxiliár limpeza iha nível sentru saúde no postu saúde hodi kompleta kuadru sira-ne’ebé mak sei falta.

Rekomenda ba Ministériu Saúde no CIGC atu aselera prosesu distribuisaun ekipamentu protesaun pesoál inklui ekipamentu prevensaun surtu COVID-19.

Komisaun F rekomenda ba Ministériu Saúde no Servisu Saúde Munisípiu atu hala’o reparasaun no manutensaun regulár ba karreta ambulánsia no motorizada hirak ne’ebé iha saúde munisípiu, sentru saúde no postu saúde hodi asegura servisu saúde públika ba komunidade.

Rekomenda ba Ministériu Saúde no SAMES atu asegura Stockout medikamentu iha ospitál, sentru no postu saúde sira.

Komisaun F mós rekomenda ba MSSI tau prioridade únika klínika saúde mentál iha Laklubar hodi fó atendimentu ba pasiente sira-ne’ebé mak moras mentál.

Rekomenda ba Ministériu Saúde atu apoia medikamentu ba klínika saúde mental iha Laklubar no halo sensibilizasaun ba komunidade ba moras mentál.

Ikus liu, Komisaun F rekomenda ba SAS hodi halo kanalizasaun bee-moos iha ospitál, sentru saúde no postu saúde sira iha munisípiu Manatuto.

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here