Primeiru-Ministru, Taur Matan Ruak, prezide reuniaun kona-ba implementasaun Estadu Emerjénsia ne’ebé folu iha liña fronteira, iha Palásio Governu, segunda (10/08). Imajen Tatoli/António Gonçalves

DILI, 10 agostu 2020 (TATOLI)-Hafoin Prezidente Repúblika dekreta Estadu Emerjénsia (EE) ba faze dahaat ne’ebé hahú vigora iha tuku 00:00 loron 06 agostu to’o tuku 23:59 loron 04 setembru, Primeiru-Ministru, Taur Matan Ruak, hahú konvoka reuniaun koordenasaun ho liña ministériu sira kona-ba medida implementasaun EE, liuliu iha liña fronteira.

Entidade ne’ebé partisipa iha enkontru ne’e, kompostu husi Ministériu Saúde (MS), Ministériu Negósiu Estranjeiru no Kooperasaun (MNEK), Ministériu Defeza no Seguransa (MDS), Ministériu Interiór (MI), Ministériu Administrasaun Estatál (MAE), Ministériu Finansa (MF), Sala Situasaun Sentru Integradu Jestaun Krize (CIGC, sigla portugés) ne’ebé reprezenta husi Brigadeiru Jenerál João Miranda ‘Aluc Descartes’.

Ministra Saúde, Odete Maria Freitas Belo, relata katak enkontru ohin ko’alia kona-ba jestaun kuarentena no kona-ba MS ninia disponibilidade atu simu ema na’in hira, nune’e bele halo jestaun di’ak ba pontu entrada sira hanesan fronteira.

Asuntu seluk maka Xefe Governu husu ba MS, MNEK, no MI relasiona ho kazu pozitivu COVID-19, bele mantein ho situasaun hanesan agora ka hakarak atu estabelese filafali CIGC.

“Ami-nia resposta, tuir informasaun ne’ebé mak ita haree husi teste ne’ebé MS halo, bele prova katak propagasaun la akontese iha rai-laran, maibé vírus ne’e importa entaun efetivu liután maka mantein ho servisu hanesan agora no MS sei kolabora hamutuk ho MI, MNEK atu nune’e bele asegura tau-matan ba fronteira no la persija estabelese hikas CIGC,” tenik Ministra Odete Maria iha Palásiu Governu, hafoin enkontru, segunda ne’e.

Notísia Relevante: Medida EE: abranje territóriu nasionál, foku fronteira atu fasilita kuarentena

Asuntu seluk, PM Taur hakarak atu hatene mós kona-ba movimentasaun iha liña fronteira.

“Ko’alia kona-ba tempu loke kuarentena, hakarak atu haree sasán ne’ebé mak tama tanba saúde la’os simu de’it husi ema tama maibé simu mós husi sasán,” nia akresenta.

Governante ne’e haktuir, kona-ba kuarentena iha fronteira Batugade, daudaun ne’e ho kama hamutuk 32 no kuarentena iha tasi-tolu loloos ne’e transforma ona ba fatin izolamentu maibé tanba kazu pozitivu laiha entaun sei utiliza ba fatin kuarentena.

Aleinde ne’e, kuarentena iha zona besik fronteira hanesan iha Munisípiu Covalima no Rejiaun Administrativa Espesiál Oé-cusse Ambeno (RAEOA) maka Governu seidauk estabelese.

“Maibé ho fundu COVID-19 bele aluga otél sira, nune’e bele akomoda sidadaun sira ne’ebé tama husi fronteira Suai no RAEOA,” nia akresenta.

Ministra mós konta tuir, daudaun ne’e, iha kuarentena kada kuartu ba ema na’in-rua de’it ho kama ketak-ketak.

“Diskusaun ohin, hafoin desizaun sei halo kuarentena ba sidadaun sira ne’ebé tama loron 14, bele aumenta tán loron tolu hamutuk 17 atu halo dezinfeta kuartu sira ne’ebé uza ona,” nia realsa.

Iha parte seluk, MNEK prontu atu halo komunikasaun ho konsuladu Timor-Leste iha Timór Osidentál, Kupang-Indonézia, atubele haree ema hira mak tama depende MS nia disponibilidade, maibé kuandu ministériu tolu (MS, MI, no MNEK) serbisu hamutuk ona entaun iha hanoin sei tau ema ida iha kuartu ida, tanba limita ona ema tama mai.

“Durante ne’e fronteira loke semana ida dala ida, ema na’in-123 maka tama. Maibé Governu aprova tiha diploma konjunta no públika ona, katak sei reduz ema tama mai territóriu nasionál ho mínimu na’in-70.

Kona-ba hahán ba ema sira ne’ebé kumpre hela kuarentena obrigatóriu, responsável husi Governu, tantu ba timor-oan no estranjeiru.

“Maibé durante ne’e sidadaun estranjeiru barak mak husu atu halo auto-kuarentena no sira responsabiliza ba sira-nia an rasik bainhira kuarentena iha otél,” nia realsa.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here