Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio  Paixão Bano. Imajen Tatoli/António Gonçalves

DILI, 10 agostu 2020, (TATOLI)–Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hateten nu’udar Prezidente Autoridade nia parte sei halo esforsu atu nune’e xefe família 500 ne’ebé seidauk simu subsídiu $200 bele hetan sira-nia direitu ba etapa daruak nian.

Notísia Relevante: MSS finaliza verifikasaun dadus reklamasaun sa’e ba 16.000-resin

“Tanba ne’e, agora hela xefe família 500 maka sei hein subsídiu $200 etapa daruak nian. Agora esforsu halo hela iha MSSI, tanba ne’e sira halo verifikasaun no preparasaun hamutuk ho 12 munisípiu nian, entaun povu Oé-Cusse hein de’it,” dehan Arsénio Paixão Bano ba jornalista sira hafoin hasoru Malu ho Vise Primeiru-Ministru no Ministra Solidaridade Sosiál no Inkluzaun iha Caicoli, Dili, segunda ne’e.

Nia dehan, bainhira preparasaun prontu ho munisípiu sira seluk, autoridade RAEOA prontu kooopera ho Governu sentrál atu aselera pagamentu ba etapa daruak nian.

“Ami prontu koopera no kolabora ho Governu atu pagamentu ne’e bele la’o. Ne’ebé, agora ami Oé-Cusse hein de’it,” nia dehan. 

Aleinde ne’e, nia hateten, kestaun relasiona ho reklamasaun ne’ebé pendente iha Oé-Cusse liuliu família 500 hosi aldeia Hautefu, Suku Banafi, Postu Administrativu Nitibe,  ne’ebé maka seidauk hetan subsídiu, agora parte tékniku sira halo hela servisu preparasaun atu selu.

Nia esklarese, totál benefisáriu ne’ebé simu subsídiu iha RAEOA, planu antes ne’e proposta ne’ebé tama hamutuk rihun 20 maibé depois halo verifikasaun, naran balu sala, balu dupla, no balu tanba saláriu liu $500 labele simu entaun, benefisáriu tun ba rihun 18.

Tanba ne’e, nia dehan, ohin hala’o sorumutu ho Vise Primeiru-Ministru no Ministra Solidaridade Sosiál no Inkluzaun (MSSI), Armanda Berta do Santos, hodi hato’o agradesimentu ba parte tékniku pagamentu subsídiu $200 ne’ebé destaka ba iha RAEOA.

“Ha’u mai ho ha’u-nia Sekretáriu Rejionál Finansa, hasoru malu ho Ministra asuntu ko’alia kona-ba Solidaridade Sosiál no Inkluzaun, dahuluk hakarak agradese ba Vise Primeiru-Ministru no ba tékniku MSSI ba apoiu sira, Rejiaun Oé-Cusse durante pagamentu subsídiu $200 ba COVID-19 nian. Durante ne’e sira halo servisu iha terrenu di’ak tebes, tanba buat hotu ita konsege bainhira ita servisu hanesan ekipa. Tanba ne’e, ami mai kontinua demonstra Oé-Cusse nia prontidaun  atu servisu ba povu Timor-Leste no ba Oé-Cusse,” dehan Arsénio Paixão Bano ba jornalista sira.

Prezidente RAEOA ne’e hateten, iha sorumutu ne’e Vise Primeiru-Ministru no Ministra Solidaridade Sosiál no Inkluzaun mós demonstra nia vontade ba futuru atu kontinua apoiu RAEOA.

“Ami ko’alia mós kona-ba kooperasaun ba oin ne’e atu estabelese akordu servisu hamutuk no memorandu intendementu, ministra rasik mós atu tau pontu fogál ida ba oin atu hadi’a di’ak liu koordenasaun entre MSSI no RAEOA,” nia dehan.

Aleinde ida-ne’e, nia hatutan, kona-ba Ró Haksolok ne’ebé Governu sentrál fó fali ba Oé-Cusse, agora estuda hela opsaun atu haree nia solusaun ne’e oinsá.

“Kona-ba Ró Haksolok ne’ebé entrga ona ba Oé-Cusse nia opsaun ami agora estuda hela,” nia hateten. 

Notísia Relevante: Benefisiáriu Rihun 3-Resin iha Oé-Cusse Simu Ona Subsídiu $200

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here