Logotipu TDD. Imajen/Egas Cristóvão

DILI, 10 agostu 2020 (TATOLI)-Ministériu Públiku (MP) liuhosi Prokuradór titular  Benvinda do Rosário, ohin, iha nia alegasaun husu ba Tribunál Distritál Dili (TDD) atu aplika pena prizaun efetivu tinan-20 ba arguidu ho inisiál AN ne’ebé deskonfia  komete kazu violasaun seksuál hasoru  lezada FF nu’udar menoridade.

Liuhusi audiénsia julgamentu ne’ebé preside husi juis koletivu Ana Paula, Maria Solana, Ivan Suritai ne’e, MP husu atu aplika pena refere tanba iha produsaun prova liuhusi julgamentu hirak liu ba bazeia ba deklarasaun arguidu, lezada no aktu ne’e antes ne’e MP arrola prienxe duni elementu  krime katak arguidu prátika duni aktu abuzu seksuál hasoru lezada iha Manleuana, Dili, iha tinan 2019.

MP mantén ninia akuzasaun hodi akuza arguidu ho krime abuzu seksuál  ba menór ne’ebé previstu iha artigu 177, númeru 1, ne’ebé hateten, se maka prátika koitu vajinál, koitu anál ka koitu orál  ho labarik ne’ebé seidauk iha tinan 14 sei hetan pena prizaun tinan-lima (5) to’o  tinan-20.

Defeza Manuel Tilman ne’ebé fó asisténsia ba arguidu, hateten, iha julgamentu sira liubá arguidu konfesa parsialmente no arrepende ba hahalok ne’ebé mak komete tanba ne’e husu Tribunál atu aplika pena adekuadu tinan-lima (5).

Hafoin rona tiha parte sira, Tribunál deside adia fila-fali julgamentu ne’e ba iha loron 24  agostu, tinan ne’e, hodi rona leitura desizaun final.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here