iklan

NASIONÁL, COVID-19, HEADLINE, KAPITÁL

COVID-19 afeta estudu viabilidade projetu dada-bee husi mota Railaco

COVID-19 afeta estudu viabilidade projetu dada-bee husi mota Railaco

Diretór Nasionál Servisu Água no Saneamentu, Gustavo da Cruz. Imajen Tatoli/Hortêncio Sanches

DILI, 10 agostu 2020 (TATOLI)–Surtu COVID-19 afeta ba progresu estudu pré-viabilidade no viabilidade ba projetu dada-bee husi mota Railaco no Gleno ne’ebé hala’o ona husi kompañia internasionál Tailándia no Koreia.

“Estudu ne’e kuaze hotu ona, maibé aprezentasaun relatóriu seidauk finaliza tanba impaktu hosi COVID-19 no konsultór internasionál sira fila ona ba sira-rai no seidauk mai Timór,” tenik Diretór Nasionál Servisu Água no Saneamentu, Gustavo da Cruz, ba Agencia Tatoli iha Suku Akadiru-Hun-Dili, segunda ne’e.

Kompañia internasionál ne’e finaliza ona estudu viabilidade iha fulan-abríl, maibé iha marsu, Timor-Leste hahú implementa Estadu Emerjénsia hodi prevene COVID-19.

Maski nune’e, nia dehan, kompañia sei esforsu atu mobiliza-an hodi fila mai hodi finaliza estudu no aprezenta relatóriu ba Ministériu Obra Públiku (MOP).

“Ita labele halo buat ida tanba COVID-19, ne’ebé ita hein prosesu estudu viabilidade ba projetu dada-bee ka projetu barrajen iha mota Railaco no Gleno, tanba empreza sira finaliza no entrega ona ninia relatóriu finál, nune’e ita bele tama ba prosesu dezeñu detalladu barrajen hafoin sei iha faze implementasaun ba konstrusaun barrajen,” tenik Diretór Jerál ne’e.

Dirijente ne’e realsa,  maski seidauk finaliza relatóriu, maibé rezultadu husi estudu viabilidade ne’e hatudu viável atu halo barrajen ka bele dada-bee husi mota rua ne’e hodi fornese ba abitante iha kapitál Dili.

Razaun empreza rua ne’e halo estudu viabilidade atu haree no analiza ba estrutura rai, nune’e bele halo barrajen prodúz bee-moos atu fornese mai iha kapitál Dili.

Governu Timor-Leste asina kontratu ho kompañia internasionál husi Tailándia ho Koreia iha loron 22 agostu 2019 atu halo estudu pré-viabilidade no viabilidade ba projetu dada bee-moos husi mota Railaco no Gleno, Munisípiu Ermera mai kapitál Dili.

Planu integradu ba estudu ne’e foku liubá produsaun bee atu fornese bee ho kualidade no saudável ba komunidade sira iha Dili, tanba produsaun bee-moos iha Dili durante ne’e depende de’it ba perfurasaun ho estasaun 26 husi bee ne’ebé iha rai-okos, tanba ne’e la sufisiente.

Sistema produsaun bee iha Dili, kada loron kuaze prodús litru millaun 52, ne’ebé fornese ba populasaun tuir sensu 2015 hamutuk 267.000 no distribui bee ba uma-kain kada loron litru 500, tanba ne’e presiza aumenta produsaun bee kada loron litru millaun 40 atu fornese ba abitante sira iha Dili.

Kompañia ne’e maka Team Consulting Engineer and Management PCL, Thailandia in JV With ATT, Consultations Company Limited, Association With Thailand and in CQ2, Engineering Consultancy ne’ebé konsórsiu họ kompañia Diversu Unipessoal, Lda inklui Donsung Engineering Co. Ltd, Korea and in Association ne’ebé konsórsiu ho empreza Kai Watu Kmanek Consultant Unipessoal, Lda.

Kompañia internasionál rua ne’e, manán konkursu liuhosi prosesu Komisaun Nasionál Aprovizionamentu (CNA-sigla portugés) ho orsamentu millaun $1, ho durasaun serbisu hahú husi agostu 2019 to’o janeiru 2020 (durante fulan lima) ho distánsia husi Ermera mai Dili kuaze kilómetru 30-resin.

Jornalista: Florêncio Miranda Ximenes

Editora: Julia Chatarina

iklan
iklan

Leave a Reply

iklan
error: Content is protected !!