Imajen/Espesiál.

DILI, 08 agostu 2020 (TATOLI)—Reprezentante igreja no akadémiku sira fó sira-nia perspetiva kona-ba patriotizmu konstitusionál iha estadu direitu demokrátiku ligadu ba inserteza polítika iha rai-laran.

Notísia Relevante: Avelino Coelho: “Karreta estadu labele tula povu ne’e kontra lei”

Semináriu nasionál ne’ebé organiza hosi Universidade da Paz (UNPAZ) ho tema “Movimentu Patriotizmu Konstitusionál: Konsiénsia Krítika ba Nasaun” ne’e aprezenta oradór sira mak hanesan Avelino Coelho, Padre Martinho Gusmão, Padre Domingos Maubere no dosente UNPAZ Fernando Dias Gusmão.

Oradór Avelino Coelho hateten, ko’alia prinsípiu legál tenke ko’alia konseitu estadu, labele ko’alia sees hosi konseitu estadu tanba se sees hosi ne’e laiha estadu no laiha regra konstitusionál.

Nia esplika, estadu tuir matenek balu dehan organizasaun polítika sidadaun, katak Timor-Leste direitu demokrátiku katak estadu ne’ebé hatuur iha lei inan maibé intermu jenériku signifika estadu hotu demokrátiku, estadu ne’ebé moris hosi prosesu ne’ebé mak naruk no estadu ne’ebé harii iha prinsípiu direitu.

“Konstituisaun ne’e ema balun halo presepsaun katak norma bázika, balu dehan konstituisaun espellu organizasaun iha sosiedade, ema refere liu ba konstituisaun sosiál la’ós konstituisaun ba estadu, balun dehan konstituisaun ne’e programátika polítika ideolójika,” Avelino Coelho esplika iha ámbitu semináriu ne’ebé organiza iha UNPAZ, sábadu ne’e.

Iha kazu ne’e, nia hateten, Konstituisaun 1975 ne’e konstituisaun programátika no ideolójika polítika. Fakuldade direitu iha universidade sira iha Timor laran tomak la lee konstituisaun dahuluk nu’udar estadu direitu demokrátiku dahuluk.

Nia dehan, Konstituisaun 1975 artigu 6 dehan nune’e Timor-Leste uma pátria komponeze ba ekonomia nasionál bazeada agrikultura, ne’e diskutível maibé prinsípiu.

Quer dizer hosi pensamentu saudozu Nicolau dos Reis Lobato, saudozu Francisco Xavier do Amaral no Borja da Costa, pensamentu atu lori sosiedade ba ne’ebé tanba ne’e mak hatuur iha estadu direitu demokrátiku. Katak, tenke hatuur iha konstituisaun eskrita tanba ita tradisaun jurídika sivilista,” nia dehan.

Entretantu, perspetiva hosi oradór Pe. Martinho Gusmão haklaken, ko’alia kona-ba patriotizmu konstitusionál figura na’in-haat indiskutível hanesan Nicolau Lobato, Francisco Xavier do Amaral, Xanana Gusmão no Borja da Costa.

“Hotu-hotu luta no hotu-hotu bele ko’alia maibé ba ami akadémiku ho dokumentu eskrita, ami halo peskiza ba dokumentu eskrita la’os istoria ko’alia mamuk de’it. Ita-nia servisu kontinua lee no hakerek, iha li’ur ne’e lae. Hanorin ema hakerek ne’e fásil no hanorin ema lee ne’e defísil. Maibé defísil liu hanorin ema hodi lee di’ak liu, hanorin ema hodi lee tanba ha’u hakerek tuir ha’u-nia kapasidade. Ko’alia ne’e, ha’u bele ko’alia hosi dadeer to’o kalan,” dehan Pe. Martinho Gusmão iha semináriu nasionál ne’ebé partisipa hosi ema na’in-800-resin ne’e.

“Se ita hateten konstituisaun ne’e sai espíritu  entaun preámbulu konstitusionál nasaun nian hatudu ita-nia orijen hosi nasaun ida-ne’e, iha filózofia polítika lee beibeik preámbulu. Saida de’it mak iha preámbulu entaun ne’e mak espíritu hosi lei,” nia hateten. 

Padre Martinho Gusmão konsidera konseitu patriotizmu konstitusionál hanesan antigu testamentu no testamentu foun ne’ebé nia parte prodús ona livru rua kona-ba Nicolau Lobato nia pensamentu.

Nia haklaken, iha bíblia hakerek bibi-atan, ne’e símbolu ba polítika katak fundadór ba estadu hanesan bibi-atan, libertadór mós bibi-atan.

Padre Martinho konsidera polítika atuál hanesan asu-fuik sira-nia leet, tanba bainhira Herodes haruka ema ba husu ba Jesus, “Ó halo ó-nia movimentu ne’e saida, ó ne’e sé, ó mak Mesias ka ó mak Jesus”.

Nune’e Jesus hateten ba ema-nia aman ne’ebé lori lia ne’e, “Ha’u (Jesus) iha asu-fuik sira-nia leet”, só asu-fuik mak Herodes tanba ne’e mak filózofu Tomás dehan ema kaer podér ne’e hanesan asu-fuik entre asu-fuik sira-nia leet.

“Hanesan juramentu, hadau-malu no tetak-malu ne’e, realmente asu-fuik iha asu-fuik entre asu-fuik sira-nia leet. Polítika agora hanesan asu-fuik entre asu-fuik sira-nia leet, sesama asu-fuik saling menerkam. Ó mai ha’u haan no ha’u ba ó haan, bosu depois mak rezolve,” Pe. Martinho Gusmão hateten.

Iha biban hanesan, Oradór Pe. Domingos Maubere haktuir uluk Igereja Katólika halo servisu ba rai-ida ne’e la’ós lori povu ba ukun rasik-aan maibé lori povu ne’e hili dalan auto-determinasaun no ikus mai povu hili duni dalan loos.

“Iha altura ne’ebá amu sira bolu ha’u padre CNRT. Ha’u dehan se povu hakarak ukun rasik-aan, ha’u bibi katak bibi atan tuir nafatin bibi sira, bibi sira hakarak ukun rasik-aan ha’u mós tuir. Libertasaun ne’e la’ós iha rai ninian. Se dehan libertasaun rai ninian entaun Jesus ne’e mak beik liu ona tanba servisu mate-aan ikus mai mate tán iha krúz. Ema hili ó ba tuur iha parlamentu no Governu tenke halo saida, nia tenke konsiénsia ba nia kna’ar tenke ho kle’an,” Amu Maubere hateten. 

Padre Domingos Maubere husu polítiku sira bele hala’o kna’ar hanesan polítiku maibé rona igereja hafoin hala’o moris mundu nian.

“Sai masin ho naroman hanesan liafuan Amu Papa mai hameno iha Tasi-Tolu entaun ita-nia nasaun sei la’o ba di’ak, se oin seluk ita sei fahe-malu nafatin tanba diabu servisu nafatin. Maromak mai kuda fini di’ak, kalan ita toba dukur diadu mai kuda fini aat. Ami la halo polítika maibé ami hanorin sarani sira sai masin ho naroman,” Pe. Domingos Maubere hateten.

Entretantu, Oradór Fernado Dias Gusmão hateten objetivu konstitusionál ne’e mak oinsá garante moris di’ak ba sidadaun hotu maibé realidade povu seidauk moris di’ak.

“Governasaun hotu-hotu durante ne’e la estável, eseptu governasaun IV Governu Konstitusionál ne’ebé konsege ho mandatu kompletu ho tinan lima, restu laiha. Oinsá mak dezenvolvimentu bele la’o kuandu estabilidade governativa laiha. Ohin loron partidu sira-ne’ebé sai determinante mak partidu kiik-oan sira la’ós partidu sira-ne’ebé hetan votu maioria hosi povu entaun ita la respeita prinsípiu demokrátiku,” nia dehan. 

Nia hatutan, sistema Governu ohin loron adota loke dalan sa’e no tún tanba ne’e mak fó impaktu makaas ba prosesu dezenvolvimentu ne’ebé la la’o

“To’o ona tempu, karik sistema Governu ohin loron la serve ona ba ita-nia rain presiza hadi’a, se lae ita la sai hosi inserteza polítiku ne’e. Kuandu na’i-ulun sira lakohi muda sistema Governu nian bele halo alterasaun ba artigu 106 hosi konstituisaun para define klaru sé mak atu-bele ba kaer Governu. Agora iha rua, ida mais votadu no ida seluk maioria parlamentár. Di’ak liu fó ba ida mais votadu ne’e katak tenke hetan maioria hodi bukan aliansa nune’e ita solusiona Governu ne’ebé la estável,” Dosente UNPAZ ne’e hateten.

Jornalista : Evaristo Soares Martins

Editór      :  Cancio Ximenes

HAKEREK NO HATÁN

Please enter your comment!
Please enter your name here