Prizaun Ai-pelu iha Munisípiu Liquiçá. Imajen/Espesiál

DILI, 09 agustu 2020 (TATOLI)-Iha preparasaun Orsamentu Jerál Estadu (OJE) 2021, Sekretaria Estadu Arte no Kultura (SEAK) iha ona programa prioridade atu hadi’a no prezerva fatin turizmu istóriku tolu hanesan Prizaun Ai-pelu iha Munisípiu Liquiçá, Ili Kere-Kere ne’ebé hanesan fatuk nakonu ho pintura iha Postu Administrativu Tutuala, Munisipiu Lautém, no fatin kulturál iha Fatubessi, Munisípiu Ermera.

“Ami sei dezenvolve fatin tutizmu istóriku hanesan Prizaun Ai-pelu, ami ba haree ona Ili Kere-kere, ita konsidera hanesan fatin turizmu kulturál no iha Fatubessi Ermera iha fatuk ida hanesan asu, ne’ebé ita konsidera hanesan fatin turizmu kulturál, ita haree atu hadi’a,” tenik Sekretáriu Estadu Arte no Kultura, Teófilo Caldas, ba Agência Tatoli, foin lalais ne’e iha edifísiu Ministériu Finansa, Aitarak-Laran.

Governante ne’e dehan, parte SEAK koordena ona ho ministériu relevante hodi bele tau iha planu tinan oin.

“Fatin ne’ebé ami identifika iha ona ninia Bill of Quantity (BoQ) no dezeñu detalladu. Hanesan Prizaun Ai-pelu ami sei serbisu hamutuk ho Ministériu Turizmu Komérsiu no Indústria (MTKI) tanba ita Ko’alia kona-ba turizmu kulturál, turizmu istóriku, turizmu relijiozu no turizmu komunitáriu hanesan área MTKI no SEAK nian, inklui Sekretaria Estadu Formasaun Profisonál no Empregu (SEFOPE) mós sei hola parte,” nia esplika.

Tuir Teófilo presiza iha koordenasaun entre kada ministériu tanba bainhira laiha bele iha dupla orsamentu entre planu ne’ebé ministériu sira halo.

“Ami-nia maka ko’alia kona-ba uma antigu sira hanesan pouzada, eis prizaun, inklui fatin lulik sira, maibé sira seluk ne’e ami labele tama tanba idaidak ninia área, se lae ita dupla orsamentu  entre ministeriu rua ka tolu bele tau orsamentu dezenvolve fatin ida, ne’e ladún di’ak,” nia akresenta.

Nia haktuir, iha aprezentasaun kona-ba rekuperasaun ekonómika ne’ebé parte SEAK asiste, ko’alia mós kona-ba diversifikasaun no prezervasaun fatin turizmu kulturál, oinsá dezenvolve fatin sira ne’e atu hatama reseita ba Estadu.

“Ita ko’alia kona-ba diversifikasaun ekonómiku no kresimentu ekonómiku, presiza hadi’a fatin turizmu kulturál no turizmu istóriku hanesan pouzada no eis prizaun hanesan Ai-pelu inklui fatin lulik no uma lulik sira atubele atrai turizta ba vizita. Entaun iha 2021 ne’e ita presiza tau osan hodi dezenvolve fatin sira ne’e hodi kontribui ba reseita doméstika ba Estadu , ida-ne’e maka ita hakarak,” Teófilo subliña.

Antes ne’e, Sekretáriu Estadu Teófilo, informa orsamentu atu reabilita Prizaun AI-pelu ne’e hamutuk $180.000, ne’ebé sei mantein ninia orijinalidade.

Sei harii mós uma rua, ida hanesan sentru informasaun no ida ba kafetaria ka restaurante, atu bele fasilita vizitante sira bainhira halo vizita ba fatin ne’e.

Jornalista: Natalino Costa

Editora: Julia Chatarina

 

HAKEREK NO HATÁN

Please enter your comment!
Please enter your name here