Vise-Ministra Finansa, Sara Lobo Brites. Imajen Tatoli/Egas Cristovão

DILI, 09 agostu 2020 (TATOLI)-Iha loron 23 juñu, Parlamentu Nasionál (PN) aprova ona proposta Lei númeru 17/V (2) kona-ba realizasaun transferénsia estraordinária fundu mina-rai daruak ho montante millaun $286,8, maibé to’o oras ne’e ezekutivu sira seidauk husu transferénsia ba konta tezouru Estadu, hosi Banco Central Timor-Leste (BCTL) hanesan jestór ba fundu tanba saldo sei sufisiente.

BCTL rasik seidauk halo transférensia tanba seidauk simu instrusaun hosi Governu, maibé iha trimestre daruak nia-laran halo ona transfénrensia millaun $250 (transferénsia estraordinária dahuluk) tuir pedidu Governu hodi reforsa saldo tezouru no ba resposta situasaun COVID-19.

Relasiona ho asuntu ne’e, Vise-Ministra Finansa, Sara Lobo Brites, rekoñese katak pedidu ne’ebé Governu halo ba PN momentu ne’abá ho karatér urjente maibé daudaun ne’e seidauk husu BCTL halo transferénsia tanba saldo tezouru no saldo ba COVID-19 sei natón.

“Pedidu ne’e loos duni urjente, maibé razaun Governu seidauk husu ba Banku Sentrál halo transferénsia osan ne’e tanba balansu ne’ebé sei iha natón hela, saldo tezouru sei iha millaun $60-resin, enkuantu saldo COVID-19 nian sei iha millaun $40-resin. Tanba ne’e mak seidauk halo levantamentu daruak,” hateten Sara Lobo, foin lalais ne’e iha Palásiu Governu.

Notísia Relevante: BCTL seidauk simu pedidu transferénsia levantamentu estraodinária fundu-mina daruak

Maski nune’e, governante ne’e dehan, fulan-agostu nia-laran Governu sei halo pedidu ba BCTL hodi husu transférensia.

“Iha fulan ne’e sei halo levantamentu, aprova uluk doudésimu agostu nia hafoin sei halo levantamentu,” nia akresenta.

Iha loron 6 abríl PN autoriza ona tranferénsia fundu mina-rai dahuluk liuhosi lei númeru 2/2020 ho montante millaun $250.

Iha loron tuirmai, ezekutivu sira husu PN autoriza halo transferénsia estraordinária daruak ho montante millaun $286,8, ne’ebé totál orsamentu ne’e atu reforsa kofre Estadu finánsia servisu administrasaun públika ho montante millaun $168,8 no antesipa despeza hasoru COVID-19 inklui rekuperasaun atividade ekonómika ho alokasaun millaun $100 ba Fundu COVID-19 to’o Orsamentu Jerál Estadu (OJE) 2020 vigora.

Governu rasik foin lalais aprova ona tetu proposta OJE 2020 ho montante millaun $1.492,3 no tuir ajenda ezekutivu sira sei submete proposta ba PN iha loron 15 setembru.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here