Diretór Nasionál Sekretáriu Estadu Juventude no Desportu (SEJD), Marcos da Costa, lansa programa Kampaña Impaktu Tabaku ba Saúde hodi dere dadili. Imajen/Osória Marques.

DILI, 08 agostu 2020 (TATOLI)–Diretór Nasionál Sekretáriu Estadu Juventude no Desportu (SEJD), Marcos da Costa, hateten luta ba vida saúde nian la’ós responsabilidade Ministériu Saúde (MS) nian mesak de’it maibé ema hotu-hotu nia konstribuisaun. 

Notísia Relevante: Juventude Timor-Leste fuma sigaru redús 30%

Nia hatutan, lansamentu ba programa kampaña impaktu tabaku ba saúde ne’e, presiza ema hotu-hotu servisu no kolabora hamutuk hodi lori joventude ne’ebé saudavel mak bele kontribui no dezenvolve nasaun Timor-Leste ba moris iha futuru.

“Luta ba vida saúde nian presiza ema hotu-hotu nia kontribuisaun no kolaborasaun hodi moris di’ak iha futuru. Tanba ne’e mak lansamentu ba programa kampaña impaktu tabaku ba saúde ne’e, presiza ema hotu-hotu servisu no kolabora hamutuk hodi lori joventude ne’ebé mak saudavel nune’e bele kontribui no dezenvolve nasaun Timor-Leste ba moris iha futuru,” dehan Diretór Nasionál Joventude no Desportu (SEJD), Marcos da Costa, iha ámbitu lansamentu ba programa kampaña impaktu tabaku ba saúde, iha Rádiu Komuniadade Comoro, Dili.

Diretór Nasionál Sekretáriu Estadu Juventude no Desportu (SEJD), Marcos da Costa. Imajen/Espesial.

Liga ba asuntu ne’e, nia dehan, joven mileniál tenke forsa, kreativa no lori desportu ba komunidade ne’ebé mak laiha ba kontrolu tabaku nian. Tanba ho ida-ne’e mak bainhira joven sira la saudavél mak labele mehi atu ba kompete desportu iha internasionál no bainhira laiha dezenvolvimentu no sustentabilidade maka nasaun ne’e la ba oin.

Kestaun tabaku ne’e, nia hateten, SEJD kolabora hamutuk ho parte relevante sira hotu atu nune’e bele hadook joven sira sira hosi tabaku, alkól, seksu livre no sai sidadaun di’ak.

“Tanba ne’e, ami kontente atu servisu hamutuk ho ANKT-TL atu lori joventude sira ba moris di’ak,” Marcos hateten.

Entretantu, Diretór Nasionál Sekretáriu Estadu Komunikasaun Sosiál (SECOMS, sigla portugés), Abel da Conceição, hateten SEKOMS 100% hakarak halo kooperasaun ho ANKT-TL no Rádiu Komunidade Comoro tanba bele desimina informasaun kona-ba programa kampaña impaktu tabaku ba saúde.

“Ho programa ne’e, ami koopera hamutuk ho ANKT-TL no Rádiu Komunidade Comoro atu nune’e bele desimina informasaun relasiona ho programa kampaña impatu tabaku ba saúde bai ta-nia joventude sira iha Timor-Leste,” nia hateten. 

Jornalista : Osória Marques

Editór        :  Cancio Ximenes

HAKEREK NO HATÁN

Please enter your comment!
Please enter your name here