Padre Domingos Maubere dada lia ho jornalista sira bainhira observa situasaun atuál iha resintu Parlamentu Nasionál, tersa (19/05). Imajen Tatoli/Egas Cristovão

DILI,08 agostu 2020 (TATOLI)-Padre Domingos Maubere, hateten Amu-Lulik sira hasai kritika hasoru lider sira la’ós atu mete iha vida polítika maibé hakarak kontribui idea ba aselera prosesu dezenvolvimentu nasionál.

Igreja ninia kontribuisaun liuhosi Amu Lulik, Madre, Bispu sira hahú kedas prosesu libertasaun nasionál  to’o ukun aan ho intesaun atu liberta povu husi Kolonialismu Portugués no invasaun Indonézia ba moris di’ak.

Notísia Relevante :Padre Maubere Triste Haree Aktu Deputadu Sira iha Parlamentu

“Ha’u rona Deputadu ida dehan padre Maubere hakarak halo polítika hasai tiha batina, ha’u senti duni tan ne’e ha’u la dun simu, tanba kna’ar Amu-Lulik nian atu hanorin povu no sarani,” informa nia durante semináriu Nasionál Movimentu Patriotismu Konstitusionál ho tema Konsiensia Kritika ba Nasaun ne’ebé hala’o iha UNPAZ Dili iha Sábadu (08/08).

Nia dehan ho Igreja Katólika ninia kontribuisaun iha setór edukasaun maka forma ona lidér sira hanesan Saudozo Nicolau Lobato, Francisco Xavier do Amaral no sira seluk tan.

“Dom Carlos Filipe Ximenes Belo, ninia karta hakerek ba Nasaun Unidus hodi husu referendum ne’e involvimentu uma kreda nian atu liberta povu ne’e husi ema a’at nia ukun, ne’e responsalblidade moral la’ós  buka rekoñesimentu,”tenik tan.

Tanba ne’e nia husu ba Estudante Universidade da Paz atu brani halo kritika bainhira lider sira laiha hanoin di’ak atu ukun nasaun Timor-Leste.

Kona-ba ho kazu harahun Meja iha Parlamentu Nasionál, Padre Domingos Maubere, ho ninia opiniaun pesoal katak Igreja liuhosi padre sira maka la konsege fó edukasaun didi’ak ba Deputadu sira hanesan mós sarani.

Tanba ne’e iha Igreja iha papel ida atu fó edukasaun sívika ba ninia sarani sira atu sai lider di’ak hodi serbí povu no nasaun.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here