Prezidente RAEOA-ZEESM,TL, Arsénio Paixão Bano. Imajen Tatoli/Egas Cristovão

DILI, 07 jullu 2020 (TATOLI)-Prezidente Autoridade (PA) Rejiaun Administrativu Oé-cusse Ambeno (RAEOA) no Zona Espesiál Ekonomia Merkadu Sosiál, Timor-Leste (ZEEMS,TL), Arsénio Paixão Bano, hasoru malu ho Primeiru-Ministru (PM), taur Matan Ruak, hodi relata kona-ba situasaun atuál iha Oé-cusse, liuliu kona-ba jestaun iha pontu entrada sira.

PA RAEOA ne’e informa, daudaun parte autoridade iha ona estratejia atu reforsu  serbisu iha fronteira pontu entrada sira no mós halo jestaun ba fatin kuarentena besik fronteira inklui haree ba rekuperasaun ekonómika.

“Presiza nafatin vijilánsia iha pontu entrada sira no iha tempu hanesan viabiliza fali Oé-cusse sai normál no hamenus impaktu ekonómiku sosiál ninian. Ami rona direta hosi Primeiru-Ministru, atu Oé-cusse bele enkuadra iha programa nasionál liuliu luta kontra COVID-19 no mós rekuperasaun ekonómika Timor-Leste. Oé-cusse tenke hola parte iha serbisu koordenasaun atubele enkuadra iha planu nasionál,” tenik Arsénio Paixão Bano, hafoin ekontru ho Xefe Governu, iha Palásiu Governu, sesta ne’e.

PA ne’e dehan, nia parte mós sempre halo apelu bebeik ba Oé-cusse oan sira nafatin kumpre medida prevensaun ne’ebé fó sai hosi Organizasaun Mundiál Saúde (OMS) no Ministériu Saúde (MS).

“Ha’u dehan ba sira tenke uza sempre máskara, labele ba fronteira no labele hakat tun sa’e fronteira, tanba moras ne’e bele hada’et hosi sé de’it. Labele halo kontaktu ho ema ne’ebé maihosi rai-li’ur no tenke la’o tuir regra hanesan mantein distánsia fízika,” nia realsa.

Nia nota katak tanba Governu sentrál deklara ona Estadu Emerjénsia, entaun Oe-cusse mós tenke kumpre regra prevensaun COVID-19 sira.

PA ne’e informa Xefe Governu katak  eskola iha Oé-cusse foin tolu maka halo re-abertura no sanulu sei tuir tan.

“Ami sei la’o neneik, tanba labarik sira tama eskola ami tauk ho problema moras hada’et COVID-19 ne’e, maibé ami la pániku no nafatin serbisu atu asegura,” nia akresenta.

Iha biban ne’e, PA RAEOA introdúz Sekretáriu Rejionál na’in-sia ba PM Taur,  hafoin simu pose foin daudaun ne’e, ne’ebé na’in-haat maka konsege marka prezensa maibé na’in-lima seluk la konsege tanba kestaun serbisu.

Iha enkontru ne’e, Arsénio Bano mós simu orientasaun hosi Xefe Governu hodi kontinua tau interese ba moris atoni-oan sira.

“Ha’u simu orientasaun hosi Primeiru-Ministru  katak tenke asegura Oé-cusse, serbisu hamutuk ekipa no sai  autoridade ba atoni  Oé-cusse tomak, la’ós ba de’it grupu ida ka ema ida. Ami hotu serbisu ba Oé-cuse nia interese no tenke tau interese nasionál maka’as liu,” nia haktuir.

Autoridade RAEOA hamutuk ho Sekretáriu Rejionál sira sempre halo kontaktu  no serbisu hamutuk entidade sosiade sivíl parte rejiaun ne’e.

“Ami halo kontaktu ho ema, grupu, partidu hotu no ami prontu atu serbisu ho sira. Ha’u mós serbisu hamutuk ho igreja atu halo Oé-cusse sai fatin seguru,” nia subliña.

Iha Enkotru durante oras ida ne’e, PA RAEOA relata progresu servisu durante fulan rua.

Arsénio Bano hetan pose iha 12 juñu 2020 hosi PM Taur.

Iha loron 01 agostu 2019, Arsénio asume kna’ar nu’udar PA RAEOA interinu durante loron 120, hafoin mandatu eis PA, Marí Alkatiri ramata iha loron 30 jullu 2019.

Iha mandatu PA Marí Alkatiri, Arsénio asume kna’ar hanesan Sekretáriu Rejionál iha Oé-cusse.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here