Komunidade hela iha lagua Tasi-Tolu nia ninin. Imajen/Foti hosi Facebook: Leos Marobo.

DILI, 07 agostu 2020 (TATOLI)–Diretora Ajénsia Planeamentu Munisípiu Dili, Emeliana Soares, hateten tuir loloos  lagoa Tasi-Tolu hanesan zona protejida no fatin istóriku hodi prezerva istória ba parke nasionál nian tanba fatin ne’e uluk Amu Papa João Paulo II hodi selebra misa no la’ós zona atu komunidade hela ba.

“Zona Tasi-Tolu, primeiru ita haree sai komunidade nia hela ba  ne’e estraga ona ambiente ne’ebé mak sai hanesan zona protejida. Fatin ne’ebá ne’e ita indika katak uluk Amu Papa João Paulo II mai iha Timor-Leste iha 12 outubru 1989. Tuir loloos, fatin ne’e ita prezerva sai fatin istóriku ka parke nasionál nian ida,” dehan Diretora Ajénsia Planeamentu Munisípiu Dili, Emeliana Soares, Agência TATOLI iha nia knaar fatin Matadouro, Dili, kinta ne’e.

Diretora Planeamentu ne’e hatutan, agora pasivu tebes ho komunidade hosi área rurál ne’ebé mak oras ne’e hela iha Tasi-Tolu hodi halo negósiu.

Diretora Ajénsia Planeamentu Munisípiu Dili, Emeliana Soares. Imajen/Osória Marques.

“Tanba ita hotu hatene katak Dili hanesan kapitál nasaun nian no kuaze ema hotu konsentrasa hodi buka moris no buka servisu tanba Dili mak roda ekonómia. Agora pasivu tebes ho komunidade hosi área rurál ne’ebé mak oras ne’e hela hela Tasi-Tolu hodi halo negósiu,” nia hatete.

Administrasaun Munisípiu Dili (AMD), nia dehan, hala’o knaar bazeia ba orientasaun hosi Governu sentrál tanba AMD hanesan implementadór tanba ne’e atu muda komunidade iha Tasi-Tolu ba fatin seluk, ne’e kompeténsia Governu sentrál nian.

“Tuir loloos ne’e parte Terras no Propriedade mak iha kompeténsia atu xama atensaun ba komunidade ne’ebé hela iha Tasi-Tolu no sira mós tenke avizu ba komunidade sira katak fatin ne’e zona protejidu nune’e ema labele hela iha fatin ne’ebá para ema hatene,” Emeliana hateten.

Nia dehan, bainhira Terras no Propriedade mak xama ona atensaun no haruka AMD hasai entaun AMD prontu kontribui maibé AMD laiha kompeténsia atu hasai ema direta hosi fatin ne’e.

Komunidade hela iha lagua Tasi-Tolu nia ninin. Imajen/Foti hosi Facebook: Leos Marobo.

Maibé, nia dehan, Ajénsia Planeamentu Munisípiu Dili nafatin servisu no koordena hamutuk ho parte hotu liuliu Terras no Propriedade atu oinsá bele buka solusaun ida hodi komunidade ne’ebé mak okupa fatin Tasi-Tolu ne’e bele tau iha fatin di’ak ida. 

Tuir nia, bainhira haruka komunidade atu sai entaun konserteza sira sai ba hela iha foho lolon no mota-laran tanba laiha ona fatin ba sira. Tanba, komunidade hirak ne’e maihosi munisípiu mak buka moris iha Dili ne’ebé sira-nia fatin laiha duni.

“Ha’u hakarak dehan katak atu hasai ema hosi lagua Tasi-Tolu nian kabe ba Governu sentrál maibé ita mós la husik sira tu hela iha foho lolon no mota-laran. Bainhira sira mak hela iha fatin hanesan mak ita bele dehan ita laiha solusaun ba kestaun ne’e,” diretora ne’e hateten. 

Ho kestaun ne’e, nia dehan, Governu kontinu esforsu makaas hodi halo estudu ida atu oinsá buka fatin apropriadu ida ba komunidade sira ne’ebé mak hela besik iha lagua Tasi-Tolu ne’ebá.

“Ita hotu hatene no akompaña katak mudansa polítika ne’e hodi troka hela de’it enatun sei impede no ita labele aselera servisu hirak ne’e,” nia dehan. 

Jornalista : Osória Marques

Editór      : Cancio Ximenes

1 KOMENTÁRIU

  1. Ha’u, nu’udar sidadaun ne’ebe halo mos uma iha Tasi-tolu parte Maslidun, husu hela ba jornalista Tatoli nian atubele ajuda husu konfirmasaun husi entidade hirak ne’ebe kompetente iha asuntu ida-ne’e, hanesan Ministru Administrasaun Estatal, Sekretariu Estadu rai no Propriedade nian no Sekretariu Estadu Ambiente, Area Protejida tasi-tolu nian ne’e to’o iha-ne’ebe, no tau markasaun ruma ka lae? Obrigadu ba tatoli

HAKEREK NO HATÁN

Please enter your comment!
Please enter your name here