Bebé foin moris. Ilustrasaun

DILI, 07 agostu 2020 (TATOLI)-Diretóra Jerál Prestasaun Saúde, Odete da Silva Viegas, husu ba inan sira iha Timor-Leste atu fó susu oan ho susu-ben eskluzivu hodi redúz ona taxa mortalidade ba labarik.

Dadus demográfiku no Saúde 2016 rejista kazu mortalidade labarik ho tinan lima mai kraik kuaze pursentu 40%.

Notísia Relevante :Inan nia susu-ben saudavel ba labarik

Nune’e mós inan sira pursentu 50 iha Timor-Leste fó susu oan ho susu-ben ezkluzivu inan nian hahú husi fulan-0 to’o fulan neen.

“Ami bolu nafatin atensaun ba inan sira katak investe iha susu-ben eskluzivu ne’e ita sei redúz ona taxa mortalidade, taxa moras inklui gastu iha família,”dehan nia ba Tatoli, iha Ministériu Saúde Caicoli, sesta ne’e.

Notísia Relevante :Susu Been Kinur Ba Bebe Nu’udar Fundu Importante

Eis Diretora Ezekutivu HNGV ne’e hateten, labarik sira atu hetan imunidade di’ak, nia sujere atu inan sira tenki fó susu labarik hahú husi fulan 0 to’o tinan rua (2), no proibidu atu inan labele fó hahan komplementár ba labarik bainhira seidauk to’o fulan neen.

“Hahú husi fulan-0 to’o fulan neen labele fó hahán seluk, labarik nia hahán mak susuben inan nian depois liutiha fulan neen mak bele fó tan hahán komplementariu,”tenik tan.

Notísia Relevante :Susubeen Inan Nakonu Imunidade Ba Bebé Hodi Kontra Infesaun

Tanba tuir nia susu-ben inan ne’e sei aumenta kolestrum para aumenta imunidade no kresimentu labarik nian.

Ministériu Saúde hakarak enfazia inan sira fó susu oan no inan isin-rua sira atu nafatin fó importansia ba susu-ben inan nian, nune’e bele hadi’a kresimentu labarik sira nian iha futuru.

Susu-ben original inan nian iha komponente no ingrediente ne’ebé fortalese ba imunidade labarik nian atu livre husi moras króniku sira bainhira idade atinju ona adultu.

“Susu-ben formula sosa iha loja ho ninia ingrediente kímiku sei fó moras kroníku mak hanesan diaréia no ispa depois halo labarik laiha vontade han no bele afeta ba má nutrisaun,” dehan Odete.

Tuir loloos inan sira tenki fó susu oan hahú husi fulan-0 to’o tinan rua.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here