Pouzada Manufahi. Imajen/Mapio.net

MANUFAHI, 07 agostu 2020 (TATOLI)-Prezidente Autoridade Manufahi, Arantes Isaac Sarmento husu ba Governu liuhosi Ministériu Turizmu, Komérsiu no Indústria (MTKI) atu hadi’a pouzada Manufahi ne’ebé mak abandona kleur ona.

Tuir autoridade munisípiu ne’e, pouzada hanesan fatin ne’ebé bele hatama rendimentu ba Estadu, tanba ne’e presiza investimentu di’ak no atrai ema hodi vizita.

“Fasilidade balun antes tau iha pouzada ne’e sei di’ak, hanesan haris fatin no pixina sira maibé tanba abandona kleur no la hamoos, maka balun sai a’at maibé bainhira tau atensaun lalais maka fatin ne’e sei atrai ema hotu. Ha’u preokupa tanba loloos fatin sira ne’e tenke jere didi’ak, nune’e bele hatama netik osan ba Estadu,” relata Prezidente Autoridade Manufahi, hafoin dada-lia ho Ministru Turizmu, Komérsiu, no Indústria, José Lucas do Carmo da Silva, iha arredór pouzada Same, Munisípiu Manufahi, sesta ne’e.

Arantes Isaac dehan, antes ne’e Governu liuhosi MTKI fó fiar ba empreza timor-oan ida maka jere maibé laiha mudansa no sai abandonadu.

Tanba ne’e, nia parte husu ba MTKI atu buka fali empreza  ida ho kapasidade hodi jere hikas fatin ka Governu tau ema hodi jere rasik.

Hatan ba preokupasaun ne’e, Ministru Turizmu, Komérsiu, no Indústria, José Lucas do Carmo da Silva, agradese tebes ba hanoin di’ak hosi Prezidente Autoridade no sei konsidera hanoin sira hodi tau-matan ba pouzada.

Daudaun ne’e Governu prepara hela planu no Orsamentu Jeral Estadu (OJE) 2021, tanba ne’e hosi vizita no observasaun direta iha fatin potensiál sira bele tau iha planu orsamentu atu halo realibitasaun.

“Loos duni fatin sira hanesan pouzada ne’e hanesan fatin turizmu ne’ebé maka ninia orijinalidade di’ak tenke prezerva ba jerasaun sira tuirmai, nune’e bele iha reseita no hatama ba kofre Estadu. Ha’u hanoin abandona kleur ona tanba ne’e ita tenke haree fali ninia jestaun, karik atu mantein ka tenke loke fali konkursu públiku hodi jere,” subliña Ministru José.

Governante ne’e kompromete katak, MTKI sei halo reabilitasaun ba pouzada ne’e no planu ne’e sei inklui iha OJE 2021 nian.

Iha vizita ne’e akompaña mós hosi Autoridade Munisípiu Manufahi, seguransa no mós hosi Komandu Polísia Munisípiu Manufahi.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here