Sekretária Jerál Parlamentu Nasionál, Cedelizia Faria dos Santos. Imajen Mídia UNESCO

DILI, 07 agostu 2020 (TATOLI)—Parlamentu Nasionál (PN) liuhosi Sekretária Jerál Parlamentu Nasionál, Cedelizia Faria dos Santos konvoka reuniaun ida hodi hahú diskute estimasaun orsamentu ba 2021 ho programa boot “hakbesik parlamentu ba povu”.

“Tetu orsamentu 2021 nian ne’e, ami-nia estimasaun ne’e millaun $16. Ne’e estimasaun de’it maibé ami sei kumpre tetu ne’ebé submete hosi Governu. Tan ne’e mak ohin ami kria grupu traballu hodi haree fila-fali planu asaun Parlamentu Nasionál nian ba tinan 2021 nian maske to’o  agora parlamentu seidauk simu testu fiskál. Maibé, liuhosi orientasaun prezidente nian, ami haree ona planu asaun 2021 inklui parlamentu bele prepara hela ami-nia tetu rasik,” Cedelizia Faria dos Santos informa ba jornalista sira hafoin prezide reuniaun ekipa traballu hodi halo elaborasaun orsamentu Parlamentu Nasionál nian ba 2021, iha sala konferénsia Parlamentu Nasionál, sesta ne’e.

Iha reuniaun ne’e diretór sira no xefe divizaun sira ko’alia kona-ba orsamentu 2020 ne’ebé sei halo ajustamentu hahú hosi fulan jullu to’o dezembru ho programa prinsipál sira.

Iha elaborasaun orsamentu 2021 ne’e partisipa hosi, adjuntu, diretór sira hotu, xefe divizaun sira no reprezentante entidade autónoma sira ne’ebé tutela ba Parlamentu Nasionál.

Nia esplika, bainhira simu tetu hosi Governu nian mai parlamentu halo ajustamentu de’it, tanba ne’e mak ohin reuniaun ne’e marka prezensa hosi Gabinete Prezidente nian, Konsellu Konsultivu Fundu Petrolífetu (KKFP),GOPAC, GMPTL no SNI nian.

“Ami hotu marka prezensa hodi haree planu ba 2020-2021 nian. Prioridade mak parlamentu nia papél halo lei sira, lei balun komisaun sira seidauk finaliza, kontinuasaun halo fiskalizasaun tuir mandatu,” nia dehan. 

“Planu boot ne’e mak atu lori parlamentu ne’e besik ba povu. Tanba ita sente parlamentu ne’e dook liu entaun planu boot ne’e uza mekanizmu oinsá mak lori parlamentu besik ba povu,” nia hateten. 

Programa “Hakbesik Parlamentu ba Povu” sai hanesan kompromisu boot liuhosi Prezidente Parlamentu Nasionál, Deputadu Aniceto Guterres, durante nia mandatu.

Sekretária Jerál ne’e fó-sai katak, planu prioridade ba tinan 2021 halo mós akizasaun ba viatura balu ne’ebé mak liu ona tempu hanesan motorizada balu no mós ba viajen estranjeiru balu, ne’e orsamenta ho millaun $6 itál maibé ne’e provizóriu de’it.

“Ami haree funsionáriu barak servisu kleur ona maibé seidauk hetan promosaun entaun ami iha dadus hotu ona atu halo mós rekrutamentu interna. Promosaun ne’e bele liuhosi rekrutamentu no mós haree mós rekrutamentu esterna balu maibé ha’u hanoin laiha númeru ida boot tanba konserteza parlamentu nia espasu kiik tebes,” nia esplika. 

Nia fó-sai katak, iha prosesu rekruratamentu ne’e sei prenxe pozisaun barak maibé bazea preokupasaun hosi diresaun sira-nian.

Iha elaborasaun orsamentu ne’e hahú diskute mós planu 2022 nian ne’ebé sei halo komemorasaun ba Asembleia Konstituente no preparasaun ne’e rasik tama iha planu 2021 nian.

Sekretária Jerál Parlamentu Nasionál, Cedelizia Faria dos Santos, prezide konkovatóriu ne’e bazea ba despaixu, Lei Organizasaun no Funsionamentu Administrasaun Parlamentár (LOFAP-sigla portugés) artigu 22 (Kompeténsia Sekretáriu Jerál) alínea 1, dehan Sekretáriu-Jerál superintedennde no koordena bazea ba despaixu Prezidente Parlamentu Parlamentu Nasionál.

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here