Ministru Turizmu, Komérsiu no Indústria, José Lucas do Carmo da Silva (klaran) ho ekipa halo observasaun ba Pouzada Maubise, akompaña hosi Jestora Pouzada Maubisse, Bella Gallos (loos), sesta (07/08). Imajen/Antónia Gusmão

MAUBISSE, 07 agostu 2020 (TATOLI)-Ministru Turizmu, Komérsiu no Indústria (MTKI), José Lucas do Carmo da Silva, hamutuk ho ekipa vizita Pouzada Maubbise hodi haree direta kondisaun no rona preokupasaun husi jestór pouzada ne’e hodi nune’e bele define halo reabilitasaun.

Tuir planu MTKI nian katak sei tau iha prioridade hodi reabilita pouzada hotu iha territóriu Timór, ne’ebé planu ne’e define iha Orsamentu Jerál Estadu (OJE) 2021.

“MTKI ho ekipa mai vizita Pouzada Maubbise ho objetivu prinsipál mak atu haree rasik kondisaun fíziku pouzada nian no dada-lia ho jerente sira hodi rona rasik, durante sira iha kontratu tinan-rua ne’e progresu oinsá ona, obstákulu durante ne’e, tanba kestaun ne’e importante tebes,” hateten Ministru José Lucas hafoin ramata enkontru ho jestora Pouzada Maubisse, Bella Galhos, iha Pouzada Maubisse, Postu Administrasaun Maubisse, Munisípiu Ainaro, sesta ne’e.

Hafoin halo observasaun, governante ne’e nota katak kondisaun fíziku hafoin reabilita iha 2017, daudaun ne’e parte balun presiza hadi’a.

“Parte sira ne’ebé presiza hadi’a iha parte ki’ik de’it, liuliu uma kakuluk sira bainhira udan been tama, no baki sira ne’e balun presija hadi’a,” nia akresenta.

Tuir proposta hosi direjente pouzada ne’e rasik no husu atu konsidera hodi tau iha planu 2021 maka hakarak tau seguransa no lutu haleu.

Sorin seluk, Jestora Pouzada Maubisse, Bella Gallos, agradese no apresia tebes tanba hetan vizita husi lideransa MTkI nian.

Jestora Pouzada Maubisse, Bella Gallos, hato’o preukupasaun kona-ba Pouzada Maubise, ba Ministru Turizmu, Komérsiu no Indústria, José Lucas do Carmo da Silva, ho ekipa, sesta (07/08). Imajen/Antónia Gusmão

“Agradese tanba ministru bele mai diretamente no rona preokupasaun hosi ami no Ministru ninia objetivu mai ne’e atu husu ami-nia hanoin, hakarak haree problema ne’ebé ami involve direta iha komunidade liuliu iha turizmu nian. Ami konta tuir am-nia problema ne’ebé hasoru, aleinde ne’e ami mós fó sujestaun,” hateten Jestora ne’e.

Problema ne’ebé maka durante ne’e pouzada hasoru maibé foin hetan solusaun mak bee-moos.

“Durante tinan-rua bee laiha no ami tenke lalin bee no sosa bee, kuandu iha bainaka barak susar tebes no vizitante sira sempre levanta problema tanba de’it bee,” nia akresenta.

Aleinde ne’e, relasiona ho situasaun polítika rai-laran iha 2017 to’o 2019, no daudaun iha 2020 ho pandemia COVID-19, afeta maka’as tebes ba rendimentu pouzada.

“Situasaun polítika afeta maka’as tebes ba ami-nia negósiu, maibé agora ho estrutura Governu ne’ebé mak kompletu ona espera bele tau-matan liután ba funsionamentu pouzada nian, maibé hanesan emprezária ida, ha’u lakohi dependénsia de’it ba orsamentu hosi Governu no tanba iha tinan-rua resin hatudu buat balun maka ami rasik halo inklui buat barak iha pouzada hanesan halo renovasaun ba pouzada, tanba ami la hein Governu,” nia haktuir.

Bela Gallos dehan, pouzada presiza duni atu halo reabilitasaun tanba parte didin lolon nian barak mak nakfera maibé tanba fatin ne’e istóriku maka tenke reabilita ho kuidadu, nune’e bele mantein ninia orijinalidade.

Hafoin vizita Pouzada Maubisse, Ministru José Lucas hamutuk ho ekipa kontinua vizita ba Pouzada Munisípiu Manufahi.

Iha vizita ne’e akompaña mós husi Xefi Gabinete MTKI, Aguia Belo Ximenes, inklui tékniku sira hosi ministériu sira.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here