Ministra Negósiu Estranjeiru no Kooperasaun, Adalgiza Albertina Xavier Reis Magno. Imajen Tatoli/Egas Cristovão

DILI, 07 agostu 2020 (TATOLI)-Ministra Negósiu Estranjeiru no Kooperasaun (MNEK), Adaljiza Magno, sesta ne’e halo diskusaun ho Ministru Justisa, Manuel Cárceres da Costa, kona-ba planu Governu atu oferese rai ba Nasaun balun hodi harii sira-ninia Embaixada iha Timor-Leste.

“Ha’u ho Ministru Justisa ami ko’alia oinsá fahe arendamentu rai  ba Embaixada sira, hanesan balu iha preokupasaun hodi husu fatin foun no balun seidauk hetan ida ne’e mak ami ko’alia para ami bele iha liafuan ida no buka dalan atu iha konkordansia ba ida ne’e,” dehan Ministra Adaljiza, ba Tatoli iha Praia dos Coqeiros Dili.

Nia dehan Ministériu Justisa maka na’in ba propriedade Estadu nian no sira maka iha poder atu oferese rai ba Embaixada sira.

“Embaixada sira mai husu rai atu harii sira-nia edifísiu ami tenke husu lai sira husi Justisa para atu bele haree,”tenik tan.

Iha sorumutu ne’e, parte rua diskute mós kona-ba pedidu husi Embaixada Estadus Unidus Amérika ne’ebé husu ba Governu atu oferese presu arendamentu rai no kontratu foun ba tempu naruk.

Notísia Relevante :Governu Sei Negosia Valór Arrendamentu Rai Ho EUA

“Ami ko’alia mós kona-ba Embaixada Estadus Unidus nian tanba sira husu estensaun ne’ebé ami ko’alia kona-ba sé ita fó iha ne’e, ita mós husu karik ita mós bele hetan fatin oituan iha Estadus Unidus Amérika iha Washington ka bele mós iha Nova Iorke,” nia hateten.

Tanba tuir pedidu EUA husu ba Governu Timor-Leste atu halo estensaun kontratu ba rai ne’ebé daudaun sira uza iha praia dos Coqeiros bele hanaruk to’o tinan 50.

Notísia Relevante :Governu Aprova Kontratu Arrendamentu Terrenu Embaixada EUA

Maibé Governu TL no EUA seidauk iha desizaun tanba sei iha prosesu negosiasaun.

Jornalista  : Hortencio Sanchez

Editór         : Agapito dos Santos

HAKEREK NO HATÁN

Please enter your comment!
Please enter your name here