Ekipa IPG rekolla hela AGI. imajen/IPG

DILI, 07 agostu 2020 (TATOLI)-Institutu Petróleu no Jeolojia (IPG, sigla portugés) foin lalais ne’e deskobre tan ezisténsia mina no gás iha área Ossu no Quelicai, Munisípiu Viqueque no área Baguia no Laga iha Munisípiu Baucau, liuhosi estudu Amplified Geochemical Imagine (AGI).

Tuir nota ne’ebé Agência Tatoli asesu iha sesta ne’e, rezultadu provizóriu ne’ebé maka identifika ona liuhosi estudu iha área Ossu, Quelicai, iha posibilidade boot ba ezisténsia gás iha dirasaun Nordeste no Sudeste.

Modul ne’ebé maka ekipa monta iha área haat ne’e maioria ho rezultadu jeosemikál ho indikasaun hosi C3-C6, ne’ebé signifika katak domina ho gás.

Enkuantu, iha parte Súl Postu Administrativu Quelicai ne’ebé tama iha área estudu, iha posiblidade boot ba ezisténsia mina iha área ida ho rezultadu jeosemikál, ne’ebé hatudu ho C12-C20, indika iha mina iha área estudu.

“Kontinuasaun hosi rezultadu estudu ne’e, IPG planeia atu halo estudu jeolojia no jeofízika intensivu ne’ebé persiza aumenta tan modul AGI besik malu liután hodi hatene kle’an no loloos hosi ezisténsia mina no gás ne’ebé maka eziste iha área hirak ne’e,” refere nota imprensa.

Razaun ne’e, tamba modul hirak ne’ebé maka monta antes iha métodu grid ho distánsia kilómetru rua, ne’ebé persiza priense tan ho distánsia ne’ebé maka besik malu hosi metru 200 to’o 500 ba área identifikadu.

Iha tinan 2019, IPG establese peskiza mina no gás iha Munisípiu Viqueque no Baucau ho métodu AGI hodi identifika ezisténsia mina no gás iha munisípiu rua ne’e.

Estudu ne’e, nu’udar kontinusaun hosi estudu ne’ebé mak hala’o ona iha tinan 2017 no 2018, hodi kolleta amostra fatuk no análiza laboratóriu atu hatene posiblidade ezisténsia mina no gás.

Bazeia ba Rezultadu análiza ne’e, tinan 2018 IPG deside atu planeia estudu kontinusaun ho metodu AGI iha tinan 2019.

Estudu refere, IPG konsege monta modul AGI ho totál 185 modul, ne’ebé modul 141 monta ho métodu grid, modul 22 monta besik iha posu Aelembata no modul 22 monta besik iha posu Betano ho totál modul 44 ho objetivu sai nu’udar modul kalibrasi.

Modul hirak ne’e, análiza ona iha Laboratóriu New Wark Delaware, Estadu Unidu Amérika, liu fulan ida no halo prosesamentu statístikamente no análiza spasiál.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here