Dadur sira iha Prijaun Becora tuir treinamentu kona-ba jere emosaun.Imajen/Agapito dos Santos.

DILI, 07 agostu 2020 (TATOLI)-Organizasaun Haktanek Direitu Sidadaun (HDS), fó ona treinamentu ba dadur hamutuk ema na’in 31 iha Prijaun Becora kona-ba oinsá atu maneja emosaun hodi enfrenta kualker situasaun ne’ebé afeta ba sira-nia moris lorloron nian.

Formadora HDS, Maria Fátima Sara Afonso, hateten treinamentu ne’e fahe ba sesaun lubuk ida ba Dadur 31 ne’e ho idade husi 17 to’o 21.

Iha sesaun ida ho topiku mota moris ne’e refleta kona-ba pesoál no psíkolojia dadur sira-nian liliu esperénsia moruk no midar ne’ebé dadur sira enfreta ona durante ne’e no saida maka sai inspiradór atu inspira sira bainhira hasoru difikuldade.

“Iha sesaun iha kona-ba oinsá atu maneja sira nia emosaun hirus no triste,  saida maka sira sei halo bainhira enfreta situasaun hirak ne’e,”dehan Formadora HDS ne’e ba jornalista sira iha Prijaun Becora, sesta ne’e.

Nia dehan aleinde ne’e iha mós materia ida kona-ba oinsá atu hatene sira nia aan no karatér nune’e bele tulun sira atu jere sira nia moris bainhira sai ona husi komarka Becora hodi fila ba família no sosiedade nia le’et.

Treinamentu ne’e la’o di’ak maski partisipantes balun la ativu iha aula tanba liga ho psíkolojia pesoál.

“Maski sira  ladun ko’alia sira, maibé sira ativu tanba iha diskusaun ki’ik, no sira hakbesik aan ba fasilitadór sira hodi ko’alia, maibé ha’u lori sira labele sente dehan hela iha fatin ida ne’e hanesan fatin kastigu maibé fatin aprende atu hariku liután sira-nia esperensia moris hodi dezenvolve aan bainhira sai husi fatin ida ne’e,”tenik tan.

Tuir planu Organizasaun Haktanek Direitu Sidadaun (HDS) sei kontinua fó formasaun ba dadur sira seluk ho topiku hanesan iha futuru.

Programa treinamentu ne’e hetan kooperasaun Entre Governu Timor-Leste ho Kooperasaun husi Alemaña liuhosi GIZ no implementa husi Haktanek Direitu Sidadaun (HDS).

Entretantu, formasaun ne’e hahu ona kinta (06/08) no sei ramata iha sabadu (08/08).

Jornalista : Nelson Sousa

Editór       : Francisco Simões

HAKEREK NO HATÁN

Please enter your comment!
Please enter your name here