Ministru Turizmu, Komérsiu no Indústria, José Lucas do Carmo da Silva, hamutuk ho ekipa akompaña hosi Prezidente Autoridade Manufahi, Arantes Isaac Sarmento, halo vizita ba parke Dom Boaventura ne'ebé lokaliza iha Luak, Munisípiu Manufahi, sesta (07/08). Imajen Tatoli/Antónia Gusmão

MANUFAHI, 07 agostu 2020 (TATOLI)-Iha ámbitu vizita Ministru Turizmu, Komérsiu no Indústria (MTKI), José Lucas do Carmo da Silva, hamutuk ho ninia ekipa iha Munisípiu Manufahi, Prezidente Autoridade Manufahi, Arantes Isaac Sarmento, sujere Governu prepara planu mestre ba konstrusaun foun parke Dom Boaventura ne’ebé hanesan fatin istóriku.

Tuir Prezidente Autoridade ne’e, rai ne’ebé mak komunidade sira oferese hamutuk ektare 23, tanba ne’e presiza halo konstrusaun foun ba parke hanesan investimentu ida hodi fó rendimentu ba Estadu.

“Hanesan servidór povu iha munisípiu, agradese tebes ba vizita Ministru Turizmu, Komérsiu no Indústria no apresia tebes ho vizita ne’e. Parte administrasaun munisípiu iha rai ektare 23 hosi komunidade no lia-nain sira entrega ona ba Governu hodi konstroe parke Dom Boaventura. Hosi ami-nia parte husu ba MTKI halo planu mestre ida hodi guia halo planeamentu di’ak iha área ne’e,” tenik Arantes Isaac, hafoin akompaña Ministru José Lucas ho ekipa vizita monumentu Dom Boaventura iha Luak, Munisípiu Manufahi, sesta ne’e.

Autoridade munisípiu ne’e dehan, planu mestre presiza kondiz ho realidade Manufahi.

“Rai Luak ne’e rai sagradu ida, rai ida ho ninia estória rasik ne’ebé mak dalaruma ita kompara fali ho fatin seluk iha diferénsia. Tanba ne’e, atu dezenvolve área ne’e presiza tebes envolvimentu iha parte munsípiu no lia-nain sira atubele hamosu planu mestre di’ak,” nia akresenta.

Tuir Arantes Isaac, parke Dom Boaventura bele sai ikóniku di’ak iha Timor-Leste no bele hetan benefísiu di’ak ba timor-oan tomak, tanba Dom Boaventura la’ós Manufahi nia mesak maibé timor-oan tomak ninia riku-soin, tanba ne’e maka presiza tebes atu hadi’a no proteje.

Iha sorin seluk, hafoin vizita no halo observasaun ba parke istóriku ne’e, Ministru José Lucas, hateten presiza tebes halo vizita ba fatin turístiku sira tanba dadaun ne’e Governu prepara hela planu no Orsamentu Jerál Estadu (OJE) 2021 nian, nune’e bele hatama ba planu.

“Vizita ne’e importante tebes ba ezekutivu sira, liuliu hanesan membru Governu foun presiza haree no ko’alia ho autoridade munisípiu. Iha vizita ne’e halo mós observasaun ba fatin turístiku sira hanesan  monumentu Luak, atu haree hafoin konsidera halo reabilitasaun ka manutensaun tanba daudaun Governu prepara hela planu no orsamentu 2021, tanba ne’e membru Governu haree saida maka presiza konsidera,” nia subliña.

Governante nota katak, problema ne’ebé identifika durante halo observasaun maka lutu ba monumentu ne’e a’at, tanba ne’epresiza halo atendimentu imediata maibé iha mós sujestaun hosi autoridade atu Governu prepara planu mestre tanba autoridade hakarak atu halo estensaun oituan ba rai ektare 23 no mós kontrusaun adisionál balun.

Parke Dom Boaventura hanesan fatin istóriku atu atrai liután ema rai-liur, tanba ne’e Ministru José Lucas dehan sei prepara dezeñu detalladu.

Nia realsa, molok prepara planu mestre ne’e sei haree hamutuk fali ho autoridade lokál inklui lia-nain sira hodi tau hanoin hamutuk, tanba ideia sira tenke maihosi komunidade no autoridade lokál sira.

Entretantu, hafoin vizita monumentu Dom Boaventura iha Luak, Ministru Turizmu, Komérsiu no Indústria, ne’ebé akompaña mós husi Autoridade Manufahi, halo vizita mós ba grupu artezenatu, grupu Tais Timor, grupu prodúz Bee-Galon iha Munisípiu Manufahi.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here