Kondisaun konsuladu onorariu Timor-Leste iha Líbanu ne’ebé hetan estragu. Imajen espesiál

DILI, 07 agostu 2020 (TATOLI)-Ministra Negósiu Estranjeiru no Kooperasaun (MNEK), Adaljiza Magno, informa esplozaun ne’ebé akontese iha Nasaun Líbano konsege estraga mós edifísiu no mobiliariu Konsuladu Onorariu Timor-Leste iha ne’ebá.

Esplozaun ida ne’e akontese iha Portu Beirute, Líbano iha tersa (4/8) provoka laloran sísmika ne’ebé hanesan terramotu ho eskala richer 3,3 no halo materiál barak maka aat iha sidade, no ema na’in 100-resin maka mate, ema na’in 5.000 maka kanek inkui ema 300.000 maka lakon hela fatin.

Governante esplika maske edifísiu refere hetan estragu, maibé Konsúl onorariu, Joseph Issa, ho ninia ekipa kondisaun di’ak.

Kondisaun konsuladu onorariu Timor-Leste iha Líbanu ne’ebé hetan estragu. Imajen espesiál

“Ita nia Konsúl onorariu iha Líbano mós afetadu tanba sira-nia edifísiu ne’e lá dook hosi fatin esplozaun ne’e, maibé grasa a deus, nia di’ak hela no fizikamente sira iha ne’ebá hamutuk ho staff sira di’ak hotu”, dehan Adaljiza Magno, ba Tatoli iha edifísiu MNEK, Praia dos Coqeiros.

Notísia Relevante :Governu no povu Timor-Leste manifesta solidaridade ba Líbanu

Atu fó solidaridade ba akontesimentu ne’e, MNEK, Adaljiza hakerek ona karta formál ida  ba Konsúl onorariu, Joseph K Issa, hodi fó korajen atu servisu ba interese Estadu TL iha rai liur.

“Ha’u simu informasaun katak, sasán balun iha edifísiu laran hetan estragu maibé ladun aat barak. Ita tenke fó duni solidadridade ba sira tanba konsúl onorariu ne’e ita la selu osan ba sira ida, ema ne’e servisu ba ita voluntáriu de’it hodi reprezenta Timor-Leste iha ne’eba”, tenik Governante.

Joseph Issa, sidadaun ho nasionalidade Líbano, assume responsabilidade hanesan konsúl onorariu TL iha Líbano hahú kedas iha 2005 to’o ohin loron hodi fasilita informasaun kredivél kona-ba Estadu Timor-Leste.

MNEK haruka ona solidaridade ba Ministru Negósiu Estranjeiru Líbano nian liuhosi Konsúl iha Jakarta, Indonézia.

“Ita tenke fó solidaridade ba sira tanba ita-nia relasaun diplomátiku ho sira dezde 2005 to’o ohin loron”, katak nia.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here