Atividade iha Suku Hae-coni. Imajen/Hae-coni

BAUCAU, 06 agostu 2020 (TATOLI)-Xefe Suku Hae-coni, Postu Administrativu Baguia, Munisípiu Baucau, Luís de Oliveira ‘Oan Fuik’, husu ba Governu liuhosi Ministériu Saúde (MS) atu konstroi sentru saúde ida tanba bainhira komunidade sira iha moras ruma tenke la’o to’o postu saúde ho distánsia dook.

“Ami haree iha suku barak Governu harii ona sentru saúde, ha’u-nia suku ne’e iha aldeia-neen ho totál populasaun 2.530 maibé laiha sentru saúde,” tenik Xefe Suku Hae-coni ba Agência Tatoli, kinta ne’e.

Nune’e, Líder Komunitáriu ne’e husu ba Governu liuhosi MS atu fó atesaun sériu atu fasilita komunidade bele asesu saúde liuhosi sentru saúde.

Luís de Oliveira dehan, durante ne’e komunidade ne’ebé moras tenke la’o ba postu saúde ho distánsia kuaze kilómetru rua.

“Bainhira ita hakarak komunidade saudável, presiza konstroi fasilidade saúde atu povu bele asesu ho di’ak,” nia fó hanoin.

Tuir nia, komunidade iha suku ne’e ladún preokupa ba hahán tanba iha to’os no natár hodi sustenta sira-nia moris loro-loron, maibé presiza mós atu asesu saúde bainhira hetan moras ruma.

Autoridade komunitáriu sira mós hatama ona proposta ba MS liuhosi postu administrativu no saúde munisipál, maibé to’o agora seidauk iha resposta.

Suku Hae-coni  kompostu husi aldeia-neen hanesan Aldeia Afalari ho uma-kain 96 ho totál populasaun 460, Baçar-Uai ho uma-kain 83 ho totál populasaun 362, Bahatata ho uma-kain 76 no totál populasaun 395, Larigua uma-kain 70 ho populasaun 348, Larisula iha uma-kain 112 ho totál populasaun 524 no Uai-Boro uma-kain 116 ho totál populasaun 441.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here