Komunidade sira tuur hein helaatu simu subsidiu $200 hosi Governu. Imajen/Antonio Goncalves

DILI, 06 agostu 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten prosesu avaliasaun ba reklamasaun hirak ne’e sei involve hotu parte relevante sira hanesan Comissão Antí Corrupção (CAC) no Provedoria Direitu Umanu no Justisa (PDHJ, Sigla portugés). 

Notísia Relevante: MSS finaliza verifikasaun dadus reklamasaun sa’e ba 16.000-resin

“Prosesu avaliasaun ba reklamasaun sira ne’e sei involve Komisaun Anti Korupsaun (CAC, sigla portugés) no pusibilidade Provedoria Direitu Umanu no Justisa (PDHJ, sigla portugés), atu nune’e iha tranparansia no tenke nakloke ba malu,” dehan Diretór Jerál MSSI, Rui Manuel Gago Exposto, ba Agência TATOLI iha nia knaar fatin MSSI Caicoli, Dili, kinta ne’e.

Rui Exposto hateten, hosi avaliasaun konjunta entre CAC ho PDHJ mak foin deside katak sé mak elizivél atu simu subsídiu $200 ne’e, tanba reklamasaun hirak ne’e balun rejistu foun.

Tuir Exposto, reklamasaun ne’ebé mak tama ikus ne’e haree hanesan rejistu foun ne’ebé parte ekipa mós konsidera de’it ona.

“Tuir ha’u-nia haree ba reklamasaun ikus-ikus ne’e foin mak rejistu entaun ita bele dehan labele ona tanba ita-nia diploma ministeriál katak rejistu ba prosesu agregadu familiar ne’e ramata ona iha loron 08 maiu liubá ne’e,” Rui Exposto hateten.

Aleinde ida ne’e, nia dehan, durante involvementu CAC ho PDHJ nian ba prosesu pagamentu hodi deteta ema balun ne’ebé mak la prenxe kritériu maibé hetan subsídiu $200 nafatin ne’e, MSSI tau iha konsiderasaun.

“Ne’e ami konsidera nafatin sira-nia relatóriu ne’ebé mak haruka mai ami, maibé ida iha ema 148 ne’e mak tebes duni la prenxe kritériu mak ita mos presiza naran ema sira ne’e. Atu nune’e ita halo aprosimasaun ba benefesiáriu sira, tanba presiza atu devolve fali osan estadu nian,” nia dehan. 

Nia dehan atu devolve ka la devolve ne’e konsiénsia ema id-idak ninia. Se sria la merese atu simu, tuir loloos sira lalika simu osan ne’e.

“Agora MSSI la ba halo rejistu, MSSI simu dadus de’it. Dala ruma ami-nia IT identifika katak ema naran hanesan ne’e iha maibé númeru kartaun elitorál la hanesan, ida hanesan ne’e mka problema. Entaun ba agora ne’e MSSI-MAE tenke koordena no ami mós konsidera relatóriu hosi CAC nian ne’e, para depois ita koko minimiza nune’e labele mosu tan problema hanesan ne’e,” nia dehan. 

Diretór Jerál MSSI ne’e dehan, problema hirak ne’e akontese tanba tempu mak limitadu tebes tanba tempu fulan rua ne’e labele halo buat hotu-hotu.

“Durante prosesu pagamentu ne’e, ita koordena di’ak ho MAE inklui ho autoridade munisipál no autoriadde komunitária sira, maibé tempu mak limitadu liu hodi ita labele halo buat hotu-hotu iha fulan rua-nia laran,” nia haktuir. 

Nia hatutan, ho problema hirak ne’e mak ba futuru tenke hadi’ak liután ona baze dadus ne’e.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here