Komandante PNTL, Komisáriu Faustino da Costa. Imajen Tatoli/Joanico de Araújo

DILI, 06 agostu 2020 (TATOLI)–Bazeia ba Dekretu Prezidensiál loron 05 agostu 2020, Prezidente Repúblika deklara Estadu Emerjénsia (EE) ba loron-30, hahú hosi tuku 00:00 iha 06 agostu no ramata iha tuku 23:59 iha 04 setembru 2020.

Tanba ne’e iha enkontru semanál, Prezidente Repúblika, Francisco Guterres Lú Olo, husu ba Komandante Polísia Nasionál Timor-Leste (PNTL), Komisáriu Faustino da Costa reforsa nafatin kondisaun fronteira.

“Prezidente Repúblika husu asegura regra EE no haree mós ba kondisaun membru sira iha fronteira tanba Timor-Leste rejista filafali kazu pozitivu ba COVID-19. Ami ko’alia hela katak ita sei reforsa didi’ak ba fronteira no ita hatene katak durante ne’e iha fronteira sidadaun sira semana ida tama dala ida tuir desizaun Governu,” tenik Komisáriu Faustino da Costa, hafoin enkontru ho Xefe Estadu, iha Palásiu Prezidensiál, Bairro Pité, kinta ne’e.

Komandante Polísia ne’e relata durante fulan-jullu nia-laran Unidade Polísia Patrollamentu (UPF) iha fronteira kaer ema tama ilegál hamutuk 140 hosi Indonézia.

“Ita sei nafatin reforsa iha fronteira no mekanizmu ne’e komandu nian,” nia subliña.

Aleinde ne’e, Faustino da Costa relata situasaun atuál iha territóriu tomak no ko’alia mós kona-ba dekretu Governu atu fó ba Polísia sira atu ezekuta durante implementasaun EE.

“Prezidente Repúblika dekreta ona Estadu Emerjénsia ba dahaat, ami sei foku ba dekretu Governu ne’ebé atu fó kompeténsia ba Polísia ezekuta implementasaun Estadu Emerjénsia no ba situasaun ne’e komandu orienta ona komandu munisípiu Dili no ba Polísia espesiál atu buka meiu haree ema sira ne’ebé halo problema iha kapitál,” nia dehan.

Komadante Polísia ne’e nota katak situasaun iha territóriu tomak daudaun ne’e la’o di’ak, maski iha Dili laran sei iha nafatin akontesimentu balun maibé to’o agora Polísia halo nafatin kontrola.

Komisáriu mós haktuir akontesimentu semana kotuk iha Munisípiu Ermera, ema na’in-rua haktalik-an, ne’ebé na’in-ida moras mentál tanba ne’e la halo otópsia no seluk maka halo ona autópsia no entrega ona ba Ministériu Públiku hodi hein rezultadu.

Nune’e mós, parte PNTL rejista asidente ne’ebé kontinua mosu hodi rezulta ema mate.

“Hun hosi problema maka atu hetan karta kondusaun, tanba ohin ba teoria, aban prátika no bain-rua lori kedas kareta ka motor, ne’ebé laiha formasaun própriu ba motorista atu koñese sinál tránzitu seidauk iha, ne’e maka sai fatór kontribui asidente ho númeru boot. Asidente ne’ebé akontese jullu nia-laran ami aprezenta  hamutuk 130 no hosi asidente ne’e mate ema na’in-sia,” nia realsa.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here