Ohin Prezidente Parlamentu Nasionál, Aniceto Guterres fo Posse Provedór Adjunto Boa Governasaun Direitu Umanu no Justisa Foun, José telo soares cristovão iha PN. kinta (06/08). Imajen/Egas Cristovão

DILI, 06 agostu 2020 (TATOLI)—Prezidente Parlamentu Nasionál (PPN), Deputadu Aniceto Guterres, ohin, fó pose ba José Telo Soares Cristovão nu’udar Provedór-Adjuntu Boa Governasaun iha Provedoria Direitu Umanu no Justisa (PDHJ).

Prezidente Parlamentu Nasionál, Aniceto Guterres, lori PN nia naran hato’o parabéns ba José Telo ne’ebé selesionadu no hetan konfiansa asume kargu refere.

“Ha’u fó apresiasaun ba provedora tanba tuir lei konforme ha’u hatene provedór adjuntu hetan nomeasaun direta hosi provedór ka provedora, klaru ke hili ema konfiansa maibé primeira vez halo prosesu ne’e liuhosi konkursu públiku, halo konkorénsia. Dalan ne’ebé provedora hili hodi garante dalan tranparénsia iha prosesu rekrutamentu ba provedór-adjuntu. Parabéns ba provedora ne’ebé halo ona prosesu ida-ne’e,” PPN, Aniceto Guterres,  hato’o apresiasaun ne’e iha ámbitu  serimónia tomada de pose ba Provedór-Adjuntu Boa Governasaun, José Telo Soares Cristovão ba iha Provedoria Direitu Umanu no Justisa (PDHJ), iha Parlamentu Nasionál, kinta ne’e.

Prezidente Parlamentu Nasionál V Lejizlatura ne’e dezafia no rekoñese susesu sira-ne’ebé PDHJ alkansa ona durante ne’e maibé husu kontinua hatudu vontade alkansa objetivu sira.

“Ha’u hakarak dezafia ita hotu nia kompromisu  no dedikasaun individuál no institusionál, partikularmente iha biban ida-ne’e provedora PDHJ no adjuntu sira no unidade oránika hotu-hotu iha provedoria kona-ba ita-nia vontade no kapasidade implemendora iha área boa governasaun. Sé mak sai imajen ezempleár ka lalenok iha área direitu umanu, boa governasaun no justisa,” dehan PPN.

Iha fatin hanesan, Provedora Direitu Umanu no Justisa, Jesuina Maria Ferreira Gomes, agradese ba Parlamentui Nasionál ne’ebé pose ona José Telo Soares Cristovão ba Provedór-Adjuntu.

Nia esplika, artigu 16 pontu 1,2 no 3 hosi Lei númeru 7/2004 kona-ba estatutu Provedór Direitu Umanu no Justisa, Provedór bele nomeia provedór adjuntu na’in-rua ka liu bazeia ba kritériu transparente no objetivu, no tau iha konsiderasaun, nomeadamente, ninia integridade, independénsia, imparsialidade no kualifikasaun ba mandate máximu tinan haat (4).

Nia fundamenta, atu kumpre artigu hirak ne’e Provedor halo despaxu númeru 05/2008/PDHJ altera ho despaixu némeru 01/2020/PHDJ loke konkursu públiku ba pozisaun Provedór-Adjuntu no kria ekipa júri hodi halo selesaun ba Provedor Adjuntu ho objetivu atu asegura prinsípiu boa governasaun  no prinsípiu Paris kona-ba kompozisaun instituisaun nasionál direitu umanu nian.

Iha tinan 2018-2019, PDHJ loke konkursu públiku ba provedor-adjuntu ba área direitu umanu no boa governasaun ne’ebé ezerse sira-nia kna’ar hosi marsu 2019 maibé provedor-adjuntu ba boa governasaun iha loron 29 maiu 2020 tanba hetan nomeasaun hanesan Ministru Administrasaun Estatál (MAE).

PDHJ loke prosesu selesaun ba provedor-adjuntu área boa governasaun hahú iha loron 17 juñu-24 jullu 2020, hala’o hosi painél júri ne’ebé komposta hosi indivídu ho alta integridade no neutralidade hosi instituisaun públiku no privada  hanesan Komisaun Funsaun Públiku (KFP), JSMP no Luta Hamutuk.

“Laiha dúvida ba sira-nia atetude transparénsia, imparsialidade no objetividade hatudu durante prosesu, ho rezultadu José Telo Soares Cristovão mak sai hanesan primeiru klasifikadu no ohin hetan tomada de pose ba Provedór-Adjuntu ba Governasaun di’ak ne’ebé sei koadjuva (coadjuva) ho Provedor Direitu Umanu no Justisa iha ninia mandate konstitusionál,” Provedora Jesuina Ferreira Gomes hateten.

Nia dehan, iha ezersísiu ba nia funsaun koadjuvasaun, Provedór Adjuntu sei hala’o funsaun ba tempu tomak inteiru tuir artigu 17 pontu 1 hosi Lei númeru 7/2004, kona-ba inkompatibilidade katak halo funsaun iha kualkér kargu ka órgaun konstitusionál seluk.

“Labele envolve iha ativiidade polítika iha partidu polítiku ka kualkér kargu polítiku no labele manán saláriu iha kualkér organizmu seluk. Kompeténsia Provedór Direitu Umanu no Justisa halo investigasaun, fiskalizasaun, rekomendasaun, promosaun ba direitu umanu, governasaun di’ak, mediasaun no konsiliasaun,” nia dehan.

Iha serimónia pose ne’e partisipa hosi Sekretária Meza Parlamentu Nasionál Deputada Lídia Norberta Soares, Vise-Sekretária Meza Parlamentu Nasionál Deputada Regina Freitas, membru parlamentu balun no Sekretária Jerál Parlamentu Nasionál, Cedelizia Faria dos Santos.

Provedór-Adjuntu ba PDHJ, José Telo Soares Cristovão, prontu kolabora ho ekipa sira iha PDHJ hodi garante boa governasaun iha rai ida-ne’e.

“Planu prioridade sira iha ne’ebá (PDHJ) ona tanba ha’u ba ne’e hanesan kontinua de’it, ha’u sei kontinua saida mak iha ona,” nia dehan. 

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here