iklan

ERMERA, MUNISÍPIU

MS hakarak Atara-oan maka destaka bá Postu Saúde Atara

MS hakarak Atara-oan maka destaka bá Postu Saúde Atara

Vise Ministru Saúde, Bonifácio 'Maucoli' dos Reis. Imajen Tatoli/Antonio Goncalves.

ATSABE, 06 agostu 2020 (TATOLI)-Vise Ministru Saúde, Bonifácio Maucoli dos Reis, propoin atu destaka pesoál saúde husi Suku Atara, postu Administrativu Atsabe Munisípiu Ermera maka bá servisu iha Postu Saúde Atara iha futuru.

Postu Saúde Atara inagura ona husi Vise Ministru Saúde iha loron 06 fulan-agostu 2020. Kompañia Sarakoe Unipessoál LDA maka ka’er obra ne’e ho númeru kontratu 05/PAM-KDM/X/2019 ho orsamentu $ 201,185.12 ho durasaun projetu fulan-neen.

”Se ita koloka ema husi fatin seluk dalaruma sira mai haree fatin ne’e dook depois ladun asesu bee entaun sira halai tiha tanba  ne’e ha’u prefere liu pesoál saúde ne’e tenki maihusi Suku Atara para sira bele hela iha ne’e hodi atende komunidade sira ne’ebé mak moras,” dehan Vise Ministru Saúde, iha Atara.

Notísia Relevante : Vise MS inaugura Postu Saúde Atara

Tuir Planu Estratéjia Dezenvolvimentu Setór Saúde ba tinan 2011-2030 kada fasilidade saúde tenki iha médiku ida, enfermeiru na’in ida, parteira no farmasista na’in ida hodi fó atendimentu ba komunidade sira iha baze.

Iha fatin hanesan Xefe Suku Atara, Postu Administrativu Atara Munisípiu Ermera, Angelmo Pereira, sujere ba Ministériu Saúde atu uza rekursu husi Atara-oan.

”Ami iha rekursu rasik atu servisu iha área saúde nian no Ami iha Doutora ida Atara-oan ne’ebé hasai kursu iha medisina jerál UNTL oras ne’e akaba ona nia estudu no mós enfermeiru, parteira ne’ebé mak balun akaba husi Indonézia maibé seidauk uza hodi halo servisu ba atendimentu pasiente nian,” dehan Nia.

Nia observa  katak durante ne’e akontese pesoál saúde husi fatin seluk ne’ebé mak destaka bá iha Atara la servisu ho másimu.

Hatan kona-ba pedidu ne’e, Vise Ministru Saúde Bonifácio Maucoli do Reis, informa Ministériu Saúde servisu hamutuk ho Komisaun Funsaun Públika hodi loke vaga ba profisionál saúde sira hamutuk 320, rekruta ona 111 no sei falta 209.

Notísia Relevante : MS inagura Sentru Saúde Hatulia B

“Agora ita loke ona vaga espera sira bele tuir no prioridade ba suku oan sira liliu ba sira ne’ebé mak besik postu saúde para sira hela ho konfortavel hodi halo atendimentu ba komunidade sira ho di’ak liután,” dehan Governante.

Jornalista : Felicidade Ximenes

Editór       : Agapito dos Santos

iklan
iklan

Leave a Reply

iklan
error: Content is protected !!