MAPKOMS inaugura sentru informasaun iha suku Hae-coni, kuarta (05/08). Imajen Tatoli/Florêncio Miranda Ximenes

BAUCAU, 06 agostu 2020 (TATOLI)-Ministériu Asuntu Parlamentár no Komunikasaun Sosiál (MAPKOMS), ne’ebé reprezenta hosi Xefe Gabinete, Jorge Geraldo Gama, halo inaugurasaun ba sentru informasaun ba programa “Naroman ba Suku”, iha Suku Hae-coni, Postu Administrativu Baguia, Munisípiu Baucau.

“Ohin ita inaugura sentru informasaun ne’e hanesan programa Naroman ba Suku, atu dada besik Governu mai iha povu nia le’et liuhosi promove informasaun entre Governu ho komunidade iha Suku Hae-coni no suku seluk  iha Postu Baguia, Munisípiu Baucau laran,” refere mensajen Ministru Asuntu Parlamentár no Komunikasaun Sosiál, Francisco Jerónimo, ne’ebé fó sai hosi Xefe Gabinete MAPKOMS, iha Suku Hae-Coni, kinta ne’e.

Iha seremónia inaugurasaun ne’e, reprezentante MAPKOMS asina mós plaka sentru informasaun iha Suku Hae-coni, ne’ebé refleta kompromisu Governu atu hakbesik-an ba komunidade.

Xefe Gabinete MAPKOMS, Jorge Geraldo Gama, asina plaka sentru informasaun iha Suku Hae-coni. Imajen Tatoli/Florêncio Miranda Ximenes

Tuir Jorge Geraldo, sentru informasaun ne’e ho karatér komunitária iha área rurál atu fasilita komunidade sira promove informasaun hanesan difikuldade ne’ebé suku ne’e enfrenta, dezenvolvimentu ka mudansa ruma iha suku, inklui preokupasaun sira atu Governu bele responde.

Liuhosi mensajen, Ministru Francisco husu ba komunidade suku atu kuidadu no asegura sentru informasaun, liuliu matériál ne’ebé instala ona.

“Ministru husu atu imi tau matan, maski investimentu ne’e la ho valór osan maibé  hanesan meiu ida atu promove informasaun sira no Governu kompromente suporta nafatin sentru informasaun ne’e,” nia akresenta.

Biban ne’e, MAPKOMS felisita Hae-coni oan tanba sentru informasaun ne’e bele harii iha suku ne’e.

Sorin seluk, Diretór Nasionál Diseminasaun Informasaun (DNDI) iha Sekrétariu Estadu Komunikasaun Sosiál (SEKOMS), Estevão Belo, husu ba komunidade suku ne’e atu kuidadu no asegura sentru informasaun ne’e hodi kontinua promove informasaun liuhosi meiu komunikasaun ba Governu no sidadaun tomak.

“Sentru ne’e ita hotu nian, la’ós Governu nian, tanba ne’e sasán iha sentru ne’e tenke kontrola no asegura hodi fasilita imi atu promove informasaun iha Hae-coni, Postu Baguia, no munisípiu tomak liuhosi meiu mídia komunikasaun sira hanesan Rádiu Televizaun Timor-Leste (RTTL), Agência Tatoli no mídia privadu seluk,” nia fó hanoin.

Dirijente ne’e dehan, objetivu harii sentru informasaun ne’e maka atu enkamiña informasaun hotu hosi Governu mai Suku Hae-coni, Munisípiu Baucau no Governu mai komunidade.

“Programa Governu iha povu nia le’et liuhosi programa Naroman ba Suku ami halo ona ba suku ualu, kompostu hosi suku rua iha Lospalos, no suku ida iha Baucau, Balibo, Maliana, Ermera no Aileu,” nia informa.

Komunidade Agradese Governu

Xefe Suku Hae-coni, Luís de Oliveira, agradese ba Governu liuliu Primeiru-Ministru, Taur Matan Ruak, MAPKOMS no SEKOMS tanba iha Minisípiu Baucau iha suku 56, maibé hili suku ne’e hodi harii sentru informasaun.

“Ha’u lori povu nia naran hato’o obrigadu wain no ha’u promote sei hamutuk ho joven Hae-coni oan tomak atu asegura sentru informasaun ne’e,” Autoridade lokál ne’e garante.

Komunidade suku, Vasco Crispim Guterres, agradese mós ba Governu tanba fasilita ona suku ne’e atu sai naroman iha Postu Baguia, Munisípiu Baucau no iha territóriu tomak.

“Ami agradese Governu tanba harii ona sentru informasaun ne’e atu bele ajuda ami hato’o preokupasaun ba Governu no bele rona informasaun hosi Governu,” nia agradese.

Entretantu, Reprezentante Eskola Bázika Filiál (EBF) haat iha suku, Nunes Texeira, agradese ba VIII Governu tanba bele hili suku ne’e atu harii sentru informasaun hodi promove komunikasaun entre komunidade no Governu.

“Ami agradese ba Governu, ami jerasaun foun promete sei kontinua obra ne’e,” nia dehan.

Governu fó ona apoiu orsamentu hamutuk $10.000 ba kada suku hodi harii sentru informasaun ba komunidade.

Naroman ba Suku hanesan programa atu lori informasaun ba nível lokál besik ba komunidade sira iha suku hodi fó dalan ba komunidade atu hato’o sira-nia preokupasaun ka obstákulu sira ne’ebé mak sira hasoru hodi aprezenta ba meiu komunikasaun nasionál sira.

Suku ne’ebé potensiál iha área agrikultura no turizmu ne’e, lokaliza iha foho Matebian ho nia luan kilómetru 17.242, ho totál populasaun 2.557, kompostu hodi aldeia neen hanesan Afalari, Baçar-Uai, Bahatata, Lariqua, Lari-sula no Uai-Boro.

Partisipa iha seremónia inaugurasaun ne’e maka Xefe Gabinete MAPKOMS, Diretór Nasionál Diseminasaun Informasaun, Diretór Nasionál Rádiu Komunidade, Vise-Prezidente Agência Tatoli, Prezidente RTTL,ep, Komandante Polísia Nasionál Timor-Leste (PNTL) Munisípiu Baucau, Autoridade suku, inklui komunidade sira.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here