Atividade iha Suku Hae-coni. Imejen/Hae-coni

BAUCAU, 06 agostu 2020 (TATOLI)-Komunidade iha Suku Hae-coni, Postu Administrativu Baguia, Munisípiu Baucau husu ba Governu liuhosi Ministériu Obra Públika (MOP) atu loke estrada foun no instala liña eletrisidade hodi fasilita atividade komunidade.

Xefe Suku Hae-coni, Luís de Oliveira ‘Oan Fuik’, hateten bazeia ba VIII Governu  nia kompromísiu atu kore povu husi kiak ba moris di’ak, mak husu atubele loke estrada foun no instala liña eletrisidade atubele nesesita komunidade nia moris loro-loron nian.

“Ha’u-nia suku ne’e hela liu iha foho Matebian, kuaze uma-kain 275 maka seidauk asesu eletrisidade no aldeia lima seluk seidauk asesu estrada, ami husu ba Ministériu Obra Públika atu bele fó atensaun sériu,” tenik  Xefe Suku Hae-coni ba Agência Tatoli, kinta ne’e.

Líder komunitáriu ne’e informa, hosi totál ne’e komunidade Aldeia Afalari ho uma-kain 78, Aldeia Baça-Uai uma-kain 25, Aldeia Lariqua uma-kain 67 no Aldeia Larisula uma-kain 105 maka seidauk asesu ba liña eletrisidade.

Maski autoridade lokál ne’e konsiente Governu labele halo milagre hodi halo dala-ida de’it, maibé presiza fó atensaun sériu atu halo instalasaun fazeadamente tuir prioridade VIII Governu.

Luís de Oliveira dehan, presiza mós loke estrada foun atu fasilita komunidade iha área rurál ne’e atubele tula produtu lokál ba merkadu no fasilita vizitante sira ba fatin turizmu istóriku rezisténsia, relijiozu no tradisionál.

Nune’e, nia husu atu MOP loke estrada foun hosi Afalari liuhosi Buriea Labalou ba knua Uaibitai hodi liga direitamente estrada husi Suku Letemumo, Postu Administrativu Quelicai ho distánsia kilómetru 10, husi área Rufa, Aldeia Larigua no Larisula liuhosi knua Hae-coni, Letegata ba Burir ho distánsia kilómetru haat.

Loke mós estrada hosi Aldeia Uai-Boro ba Uaibitai ho distánsia kilómetru haat, husi Aldeia Bahatata ka Kaikassa, Behe Isi ba Sara-Isi ne’ebé baliza ho suku Bahatata Postu Administrativu Uatucarbau ho distánsia kilómetru rua no halo mós eskada hosi Aldeia Uai-Boro ba Cristo Rei ho distánsia kilómetru lima.

“Ami mós halo ona proposta ba Ministériu Obra Públika atu loke estrada foun atu fó konsiderasaun iha mandatu VIII Governu ne’e bele implementa netik ida pur ida, ne’e maka ami komunidade Suku Hae-coni nia prioridade,” nia fó hanoin.

Suku Hae-coni potensiál ba agrikultura hanesan koto, batar, fehuk midar, fehuk roupa, repollu, talas, kontas no modo inklui seluk tan no turizmu istóriku tanba iha foho Matebian ne’ebé sai fatin ba rezisténsia luta libertasaun nasionál.

Suku ne’e hela iha foho Matebin ho nia luan kilómetru 17.242, ho totál populasaun 2.557 kompostu hosi Aldeia neen hanesan Afalari, Baçar-Uai, Bahatata, Larigua, Lari-sula no Uai-Boro.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here