Ministra Saúde, Odete Maria Freitas Belo Hamutuk ho Embaixadór Austrália iha Timor-Leste, Peter Roberts Inagurasaun Sentru formasaun kuidadu emerjensia obstetriku no Neonatal. Imajen /Egas Cristovão

DILI, 06 agostu 2020 (TATOLI)-Governu liuhosi Ministériu Saúde hamutuk ho Organizasaun Mundiál Saúde, Fundu Populasaun Nasaun Unida (UNFPA-sigla inglés) kinta ne’e inaugura Sentru Formasaun Kuidadu Emerjénsia Obstétriku Neonatal (KEmON) Ospitál Nasionál Guido Valadares Dili (HNGV).

Sentru Formasaun KemON ne’e inaugura husi Ministra Saúde, Odete Maria Freitas Belo, Reprezentante OMS, Rajesh Pandev, Embaixadór Austrália, Peter Roberts, Reprezentante UNFPA no seluk tan.

Kustu orsamentu ba reabilitasaun Sentru Formasaun ne’e apoiu husi Organizasaun Mundiál Saúde  iha Timor-Leste no UNFPA ho montante  rihun $ 160-resin. Husi totál apoiu orsamentu ne’e metade ezekuta ba reabilitasaun no restu hodi sosa ekipamentu formasaun ba parteira no médiku sira.

Medíku Obstetra HNGV,  José António, hateten sentru formasaun ne’e harii ho objetivu forma médiku no parteira para jere kazu obstétriku (ran fakar) ne’ebé komplikadu ba inan sira tanba kazu mortalidade inan no oan aas iha Timor-Leste.

“Objetivu ikus mak atu redús mortalidade inan ho bebé tanba bebé bele mate iha inan-nia kabun laran bele mós mate bainhira partus”, dehan Eis Diretór Ezekutivu HNGV ne’e ba jornalista sira iha HNGV, kinta ne’e.

Nune’e mós atu hasa’e liután abilidade médiku no parteira sira foun sira ne’ebé maka foin ramata estudu husi universidade.

“Edifísiu ida ne’e ita halo tuir padraun ida ne’ebé bele fornese fasilidade para medíku ka parteira sira bele aprende ho padraun ida ne’ebé eselente no ho sala ne’ebê iha bele akomula ema na’in 16”, dehan tan.

Iha fatin hanesan Ministra Saúde, Odete Maria Freitas Belo, hodi Governu Konstitusionál daualu nia-naran hakarak agradese ba apoiu tomak husi doadór sira hanesan OMS,UNFPA no seluk tan.

Nune’e mós Reprezentante Organizasaun Mundiál Saúde (OMS), Rajesh Pandev, kompromete sei nafatin fó apoiu ba Governu hodi dezenvolve setór saúde ba futuru.

Entretantu, Sentru Formasaun ne’e kompostu husi sala partu, ofisina, eskritóriu, armazén no seluk tan.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here