Primeiru-Ministru, Taur Matan Ruak prezide reuniaun Konsellu Ministru estraordinária, iha Palásiu Governu, kinta (06/08), Imajen Tatoli/Egas Cristovão

DILI, 06 agostu 2020 (TATOLI)-Governu liuhosi desizaun Konsellu Ministru (KM) aprova projetu deliberasaun, ne’ebé aprezenta hosi Ministru Finansa, Fernando Hanjam, kona-ba tetu dotasaun orsamentu temporária (DOT) fulan-agostu ho montante millaun $118.

“Konsellu Ministru aprova projetu deliberasaun relasiona ho tetu finál ba dotasaun orsamentál  ba fulan agustu 2020 ho valór ne’ebé fixa milliaun $118,” tenik Ministru Prezidénsia Konsellu Ministru, Fidelis Manuel Leite Magalhães, hafoin remata reuniaun estraordinária ezekutivu sira iha Palásiu Governu, kinta ne’e.

Governante ne’e dehan, montante ne’ebé fiksa ona inklui ona empréstimu sira.

Antes ne’e, ezekutivu sira aprova DOT ba fulan-juñu nian ho montante millaun $122,3 inklui pagamentu ba empréstimu.

Governu fiksa DOT ba fulan-maiu nian ho montante millaun $122 (inklui empréstimu) maibé bainhira esklui empréstimu millaun $114, ne’ebé fahe ba kategoria haat hanesan saláriu no vensimentu millaun $17,852, bens no servisu millaun $44,894, transferénsia públika millaun $26,591, no kapitál dezenvolvimentu millaun $26,242, esklui kapitál menór.

Vise-Ministra Finansa, Sara Lobo Brites, informa ona katak durante implementasaun Estadu Emerjénsia Governu ladún iha atividade tanba ne’e maka gastu reál mensál hamutuk pur volta millaun $56 to’o $65.

Utilizasaun rejime duodesimál sura hosi prosesu aprovasaun Proposta Lei Orsamentu Jerál Estadu (OJE) 2020, ne’ebé seidauk konklui no la tama vigór iha 1 janeiru 2020.

Nune’e, rejime ne’e sei ramata automatikamente bainhira orsamentu 2020 tama iha vigór.

Regra no prosedimentu aplikasaun rejime duodesimál ba instituisaun Estadu hotu presiza prepara DOT bazeia ba prinsípiu rua mak hanesan dotasaun orsamentál kobre de’it despeza durante períodu la liu fulan ida no dotasaun orsamentál labele liu um doze avos (1/12) husi orsamentál ne’ebé define ona tuir Lei Orsamentu Jerál Estadu (OJE) númeru 13/2016.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here