Ponte Laleia troka naran Ponte ‘Nelson Mandela. Imajen/Espesiál

DILI, 06 agostu 2020 (TATOLI)-Iha reuniaun Konsellu Ministru (KM) estraordinária kinta ne’e, aprova projetu rezolusaun Governu, ne’ebé aprezenta hosi Ministru Obra Públika, Salvador Eugênio Soares dos Reis Pires, kona-ba atribuisaun naran ba Ponte Laleia iha mota Laleia nia sorin, lokaliza iha estrada nasionál A01, ho naran Nelson Mandela, ne’ebé hanesan antigu Prezidente Áfrika Súl, Premiadu Nobel Paz, no defensór boot kauza Timor-Leste.

Ministru Prezidénsia Konsellu Ministru, Fidelis Manuel Leite Magalhães, inisiativa troka naran  ponte Laleia ba Nelson Mandela ne’e, bazeia ba proposta eis Prezidente Repúblika, José Ramos Horta, ne’ebé enkamiña ba Primeiru-Ministru, Taur Matan Ruak, no to’o ikus lori ba Ministériu Obra Públika (MOP).

“Aprezentasaun ne’e hetan apoiu hosi Ministru Administrasaun Estatál (MAE), ne’ebé maka ninia kompeténsia mós relasiona ho tau naran ba ponte no estrada sira. Tanba ne’e ohin Konsellu Ministru  konkorda  proposta ne’e, hanaran Ponte Nelson Madela”, dehan Ministru Fidelis hafoin reuniaun estraordinária ezekutivu sira iha Palásiu Governu, kinta ne’e.

Proposta ne’e submete ona iha komemorasaun Loron Internasionál Nelson Mandela iha loron 18 jullu, ne’ebé hanesan ninia loron moris.

“Loron 18 jullu nu’udar loron Nelson Mandela nian, nune’e bele fó omenajen ba nia. MOP liuhosi Diresaun Jerál halo kedan identifikasaun ba ponte haat hodi hato’o ba Primeiru-Ministru, hili hodi tau naran eis Prezidente Áfrika Súl, Nelson Madela,” nia subliña.

Iha tinan ida ne’e, selebrasaun loron ne’e konta mós prezensa hosi antigu Prezidente no Premiadu Nobel Paz, José Ramos Horta no selebra hosi nasaun sira ho atribuisaun naran ‘Nelson Mandela’ ba ponte ne’ebé reprezenta obra no moris personalidade ne’e hanesan “Konstrutór ponte umanidade, mediasaun, ba rekonsiliasaun no paz”.

“Agora ofisiálmente hanaran Ponte Nelson Madela no ita hein públikasaun iha jornál repúblika,” Ministru akresenta.

Konstrusaun ponte ne’e hahú iha loron 18 Agostu 2016, ne’ebé toma konta hosi kompañia Shanghai Group Ltd hosi Cina, hafoin pasa iha prosesu aprovizionamentu  ne’ebé han tempu kuaze tinan-rua.

Ba obra ne’e, Governu kontrata konsultór hosi Japaun, Filipina no Indonézia hodi kontrola obra.

Projetu ne’e tama iha pakote I konstrusaun estrada Dili-Manatuto no pakote II konstrusaun ponte Manatuto liga ba Munisípiu Baucau.

Projetu pakote I uza fundu empréstimu hosi Japan Internasional Cooperation of Agency (JICA) ho totál orsamentu millaun $48,3, enkuantu pakote II hosi fundu empréstimu Asian Development Bank (ADB) ho totál millaun $59,2.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here