Kareta. Foto TATOLI: Rafy Belo

DILI, 06 agostu 2020 (TATOLI)–Diretór Aprovizionamentu Ministériu Solidaridade Sosiál no Inkluzaun (MSSI), Danino da Cunha, hateten Governu liuhosi MSSI halo selesaun dokumentu kompañia ba aluga karreta privadu sira bazea ba kritéria.  

Notísia Relevante: Deskonfia, indísiu favoritizmu ba kontratasaun veíkulu ba ekipa pagamentu agregadu familiár

“MSSI simu no halo selesaun dokumentu kompañia nian bazea ba kritériu ne’ebé mak ita-nia ekipa task force MSSI nian iha. Katak, tenke ho presu ne’ebé mak kiik tanba ita-nia osan la to’o,” dehan Diretór Aprovizionamentu Ministériu Solidaridade Sosiál no Inkluzaun (MSSI), Danino da Cunha, ba Agência TATOLI, iha nia servisu fatin Caicoli, Dili, kinta ne’e. 

Tanba, nia dehan, kritéria ne’ebé mak Governu fó sai maka presiza pakote katak kustu kareta, akomodasaun ba hahan nian inklui ona manutensaun ka keta karreta aat iha dalan karik, ne’e kompañia nia responsabilidade hotu.

“Planu ne’ebé mak ekipa task force MSSI hakrak ne’e selu pakote de’it. Tanba, ita-nia osan la to’o atu aluga no selu keta-ketak. Tuir loloos ne’e Governu responsabiliza ba veíkulu de’it, kona-ba buat seluk ne’e kompañia nia responsabilidade,” nia dehan. 

Dokumentu hotu-hotu, tuir nia, agora iha hela prosesu nia-laran no bainhira mosu indisíu favoritizmu karik parte relevante mak hatene tanba sira mós akompaña hotu prosesu ne’e tomak.

Diretór Aprovizionamentu Ministériu Solidaridade Sosiál no Inkluzaun (MSSI), Danino da Cunha (tuur iha liman-kuana-faru mutin). Imajen/Osória Marques.

“Dokumentu ami entrega hotu ona ba sira-nia liman. Katak, buat saida mak ami halo ne’e loos no justu hela. Maibé se durante tuir CAC ho PDHJ nia akompañamentu no verifikasaun ba dadus ne’e mak laloos ne’e ami labele hatene. Maibé ami hein de’it hosi parte kompetente sira halo xamada,” nia dehan. 

Nia esplika, mezmu limitasaun tempu maibé parte ekipa avaliasaun hosi diresaun aproviziomentu nafatin halo selesaun ba dokumentu kompañia sira-nian.

Entretantu Xefe Ekipa Avaliasaun MSSI, Arnaldo Venáncio Gurmão, hateten prosesu selesaun ba dokumentu kompañia hodi apoiu ba prosesu agregadu familiár ne’e bazea ba kritéria ekipa task force MSSI nian.

“Governu presiza presu aluger ba ka4reta ne’e kiik no prosesu selesaun ba dokumentu kompañia nian ne’e, ita haree hosi sertifikadu legál. Katak, sira mós selu taxa ba estadu tanba ne’e ita konsidera sira hodi simu. Maibé kompañia haat (4) seluk labele tanba sira ho razaun dehan sira-nia karreta ema aluga tiha ona. Kompañia balu laiha motorista no sira la konkorda ho selu pakote ne’e. Sira hakarak selu keta-ketak, maski sira hatama tiha ona dokumentu,” nia dehan. 

Nia informa, kompañia lima (5) mak momentu ne’e kompete ba aluga karreta hosi Governu ba agregadu familiar mak hanesan MISHRA  AUTOMOBILE Unipessoal, Lda; NUR DI’AK Unipessoal, Lda; ZEAL Unipessoal, Lda; MUTIARA no SENTINEL.

“Dokumentu hosi kompañia sira-ne’e sei liuhosi avaliasaun no análiza hosi ekipa avaliasaun aprovizionamentu MSSI nian. Ita-nia análiza no objetivu hosi dokumentu kompañia atu haree liubá ba kustu karreta ne’e. Maibé to’o ikus laiha kompañia ida mak passa ba kritéria hosi Governu nian,” Xefe avaliasaun ne’e haktuir.

Nia dehan kompañia MISHRA  AUTOMOBILE Unipessoal, Lda husu $145 ho nia karreta hamutuk 148, kompañia NUR DI’AK Unipessoal, Lda husu $150 ho nia karreta hamutuk 27; kompañia ZEAL Unipessoal, Lda husu $160 ho nia karreta 30; kompañia MUTIARA husu $130 ho nia karreta hamutuk 11 no kompañia SENTINEL $160 ho nia karreta hamutuk 81.

“Kompañia MUTIARA husu $130, ne’e tama ona ba kritériu maibé nia akomodasaun no motorista inklui ho manutensaun ne’e hakarak Governu mak responsabiliza entaun ita labele aseita ho sira-nia dokumentu ne’e,” nia dehan. 

“Entaun ikus mai ita deside no hili kompañia MISHRA  AUTOMOBILE Unipessoal, Lda. Depois ami halo negosiasaun fali ho kompañia hodi redús tan osan ba $135 no sira konkorda duni ho presu ne’ebé mak ami fó, ne’ebé mak inklui ona ho akomodasaun no mós motorista. Maibé antes ne’e Governu planu kada kareta $145,”  nia informa 

Tuir planu Governu nian, nia haktuir, presiza karreta hamutuk 340 maibé dehan seidauk fiksu tanba sei halo ho koordenasaun ho patrimóniu estadu. Maibé, patrimóniu estadu haruka duni karreta mai MSSI hamtuk karreta 181.

“Ita hanoin sei to’o entaun ekipa task force halo fali pedidu ida hodi husu karreta privadu 148 hodi ajuda ba karreta patrimóniu estadu nian,” Arnaldo relata.

Nia esplika, ekipa tékniku sira sei halo verifikasaun hela ba invoice ba kada karreta nian bainhira tula ekipa pagamentu ba munisípiu sira, no to’o agora seidauk selu ba kompania MISHRA AUTOMOBILE Unipessoal, Lda tanba sei iha prosesu nia laran.

Notísia Relevante: Governu Aloka Orsamentu $279.720 Aluga Karreta 148 Hodi Fasilita Ekipa Pagamentu

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here