Imajen/Evaristo Soares Martins.

DILI, 06 agostu 2020 (TATAOLI)—Bankada Congresso Nacional da Reconstrução de Timor (CNRT) kestiona legalidade autorizasaun Estadu Emerjénsia hosi Parlamentu Nasionál horisehik.

Liuhosi Konferénsia Imprensa, Reprezentante Bankada CNRT, Gabriel Soares, ne’ebé hato’o deklarasaun ne’e no akompaña hosi Vise-Xefe Bankada, Deputadu Patrocínio Fernandes dos Reis, hakarak hateten ba públiku tomak katak horisehik iha loron kuarta-feira (05/8/2020), Prezidente Parlamentu Nasionál “Ilegál no Inkonstitusionál” komete tán irregularidade klara no grave hasoru Estadu Direitu, tanba konsientemente halo manipulasaun ba ajenda plenária estraordináriu no viola Rejimentu Parlamentu nasional.

Iha debate ne’e, Bankada CNRT husu atu halo ajendamentu ba plenária iha loron kinta-feira (06/8/2020) ka mais tarde sesta-feira atu nune’e marka mós prezensa hosi Primeiru Ministru hodi esplika motivu no medida adekuadu sira- ne’ebé maka Governu tenke halo hodi hasoru COVID-19 iha prosesu implementasaun Estadu Emerjénsia nian.

Mosu pro-kontra tanba Presidente Meja no Bankada Governu nian “obriga” atu halo votasaun sem prezensa no esplikasaun hosi Primeiru-Ministru.

Tanba-ne’e, Bankada CNRT foti pozisaun sai hosi plenária “walk-out”, tanba Meza Prezidente Parlamentu Nasional ‘ilegalmente’ admite no hakat liu ona prosedimentu normál no rejimentál bainhira halo prosesu lejizlativa espesiál (Declaração do estado de sítio ou do estado de emergência).

Razaun Bankada CNRT foti pozisaun “walk-out” mak hanesan tuir mai ne’e:

  1. Plenária la tuir ona deliberasaun reuniaun líder bankada parlamentár ne’ebé deside atu debate planu ba konvokasaun Parlamentu Nasionál hodi halo apresiasaun ba pedidu autorizasaun Prezidente-Repúblika atu deklara Estadu Emerjénsia. Maibé reuniaun konvokatóriu transforma tiha ba iha votasaun autorizasaun Estadu Emerjénsia sein prezensa Primeiru-Ministru ka Governu nian. Ne’e hatudu momoos violasaun ba Rejimentu Parlamentu Nasionál.
  2. Rejimentu Parlamentu Nasionál hateten momoos katak, atu debate no halo deliberasaun no hodi fó autorizasaun Estadu Emerjénsia tenke iha prezensa Primeiru-Ministru nian tanba tuir artigu 119.2 Rejimentu PN hateten, “O debate não pode exceder um dia e nele tem direito a intervir prioritariamente o Primeiro-Ministro, por 60 minutos, e um Deputado por cada bancada parlamentar por 30 minutos cada um”. Intervensaun Primeiru-Ministru atu esplika razaun aplikasaun Estadu Emerjénsia, medidas ne’ebé Governu tenke foti atu prevene no kombate propagasaun pandemia Covid-19.
  3. Bainhira Governu la marka prezensa iha debate no votasaun ba Estadu Emerjénsia, deputadu sira sei la hetan esplikasaun klara ba medida implementasaun ne’ebé mak Governu atu foti, oinsá manutensaun ba fasilidade kuarentena no isolamentu, kustu ne’ebé tenke hasai, oinsá atu asegura movimentu tama-sai iha fronteira, aeroportu no porto, no seluk-seluk tán.
  4. Tuir artigu 71, forma votasaun ba kazu Estadu Emerjénsia, nia dalan mak halo ho “votasaun nominal”, signifika kada deputadu deklara nia-votu verbalmente. Maibé votasaun ba autorizasaun Estadu Emerjénsia ida horseik ne’e ho “votasaun ordinária” (tuir artigu 70), iha diferensia ho esperiénsia ba norma sira tuir Lei iha tempu hirak liubá. Klaru no momoos hatudu katak, desizaun sira ne’ebé akontese iha plenária viola prosedimentu legál no rejimentál. Ne’e hatudu momoos PPN “Ilegál” no Inskonstitusionál, laiha liu memoria instituisional no mukit koñesimentu ba Rejimentu Parlamentu nu’udar dalan úniku atu guia prosesu tomak iha Parlamentu Nasional .

“Bankada CNRT komprende didi’ak situasaun ida-ne’e, sei halo esforsu hotu-hotu atu kontribui ba iha prosesu salva ita-nia rai doben Timor-Leste hosi pandemia Covid-19. Tanba-ne’e maka ami enkoraja Governu de facto atu uza Lei Sistema Saúde hodi halo vijilánsia epidemiolójika no sanitária, inklui atu halo vijilánsia ba mobilidade pesoa entranjeiru bele uza deit Lei de Migração e Azilu, ita la presiza aplika beibeik Estadu Emerjénsia hodi fó risku ba ita-nia Povu nia moris no estraga liután ita-nia ekonomia rai laran,” Bankada CNRT ne’e hateten.

Hatán ba kestaun ne’e, Deputada Bankada FRETILIN, Josefa Pereira esplika, konstituisaun no rejimentu fó fatin ba Komisaun Permenente aprova rezolusaun hodi autoriza Xefe Estadu dekreta Estadu Emerjénsia.

“La presiza prezensa membru Governu, se parlamentu la bolu Governu laiha problema ida. Konstituisaun RDTL artigu 102 fó fatin ba Komisaun Permanente aprova rezolusaun ruma, ne’ebé ke fó fatin ba Prezidente Repúblika dekreta estadu de sítiu no estadu emerjénsia. Ida horisehik ne’e la’ós estadu de sítiu maibé estadu emerjénsia,” Josefa hateten.

Tanba, tuir nia, mensajen Xefe Estadu nian klaru tiha ona kona-ba razaun sira atu dekreta Estadu Emerjénsia ne’e ligadu ba pandemia COOVID-19 ne’e.

“La presiza Governu mai iha parlamentu tanba Governu mak husu ba Prezidente Repúblika atu dekreta estadu emerjénsia entaun Prezidente Repúblika tenke haruka mensajen mai Parlamentu Nasionál, hein de’it halo konfirmasaun iha dia 11 agostu 2020,” nia dehan. 

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here