Provedora Direitu Umanu no Justisa (PDHJ), Jesuína Maria Ferreira Gomes. Imajen Tatoli/ Egas Cristóvão

DILI, 06 agostu 2020 (TATOLI)-Provedora Direitu Umanu no Justisa (PDHJ), Jesuína Maria Ferreira Gomes, konsidera aktu husi membru Polísia Nasionál Timor-Leste (PNTL) na’in-ida  ne’ebé halo agresaun (baku) hasoru suspeitu ka detidu ida iha fatin detensaun eskuadra polísia nian viola direitu umanu no regra atuasaun polísia nian.

Jesuína Ferreira hateten, kazu polísia baku ka halo agresaun fíziku ba suspeitu no detidu sira, dala-rua ona. Tanba antes  ne’e, akontese ona iha eskuadra polísia Postu Administrativu Atabae, Munisípiu Bobonaro no viral mós iha rede sosiál Facebook no ba dala-ida kontinua viral tan.

PDHJ rasik halo ona monitorizasaun konklui ona relatóriu ho rekomenda ba ministériu tutela no komandu PNTL hodi foti ona medida.

“Lasala horibainrua mós iha fali video ida tan ne’ebé viral loos, tuir informasaun ne’ebé simu katak  deskonfia halo hosi membru polísia ida ne’ebé antes  ne’e halo asaun refere kontinua halo nafatin deskonfia akontese iha eskuadra polísia Atabae nafatin,” hateten Provedora PDHJ, Jesuína Maria Ferreira Gomes, ba Agência Tatoli iha edifísiu Komisaun Anti-Korrupsaun (CAC), Farol, Dili, horiseik.

PDHJ komunika ona ho Komandu Jerál PNTL no Komandu PNTL rasik sira nia parte sei sériu hodi foti prosesu ne’e.

“Tuir informasaun katak, komandu PNTL agora bolu tiha ona membru PNTL ne’e atu finaliza prosesu investigasaun,” Jesuína Ferreira hateten.

Jesuína Maria Ferreira Gomes  konsidera atuasaun ne’e iha indísiu forte ba violasaun direitu umanu. Nune’e, PDHJ iha devér atu koopera ho komandu PNTL ba prosesu investigasaun ne’ebé komandu hala’o no  bele hato’o atualizasaun ba PDHJ, maibé  iha prosesu kuandu lori tempu naruk PDHJ sei foti inisiativa investigasaun rasik.

Hatán ba asuntu ne’e Komandante Jerál PNTL, Komisáriu Faustino da Costa hateten, prosesu investigasaun ba kazu video viral ne’e daudaun la’o hela  no autór ida komete hanesan mós ho  ida uluk akontese.

Jornalista  : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here