Logo Expo Dubai 2020. Imajen/Espesiál

DILI, 06 agostu 2020 (TATOLI)-Konsellu Ministru (KM) aprova projetu rezolusaun Governu ne’ebé prosede ba alterasaun dahuluk rezolusaun Governu númeru 20/2019, loron 14 jullu, ne’ebé nomeia Autoridade Nasionál ba Expo Dubai tinan 2020 nian.

Ministru Prezidénsia Konsellu Ministru, Fidelis Manuel Leite Magalhães, informa ho alterasaun ne’e, Ministériu Turizmu, Komérsiu no Indústria (MTKI) maka hanesan departementu governamentál ne’ebé responsável ba konsesaun, ezekusaun, koordenasaun no avaliasaun polítika, ne’ebé define no aprova ona hosi KM ba área turizmu, atividade ekonómika komersiál no indústria.

“Agora Expo Dubai la’ós ona direitamente iha Primeiru-Ministru nian okos maibé pasa fali ba Ministru Turizmu Komérsiu no Indústria nia okos,” dehan Ministru Fidelis hafoin ramata  reuniaun ezekutivu estraordinária iha Palásiu Governu, kinta  ne’e.

Tuir Ministru, ho mudansa ne’e Autoridade Nasionál ba Expo Dubai daudaun ne’e maka Ministériu Turizmu, Komérsiu no Indústria, José Lucas do Carmo da Silva.

Antes ne’e, Governu Emiradu Árabe Unidu (EAU) deside adia espozisaun, ne’ebé tuir oráriu eventu mundiál ne’e sei realiza iha outubru 2020, maibé muda ba loron 01 outubru 2021 to’o 31 marsu 2022, iha Dubai, EAU, tanba kauza husi pandemia COVID-19.

Iha área espozisaun, Timor-Leste hetan ona espasu atu halo aprezentasaun produtu iha espozisaun ne’e ho luan metru 250, ne’ebé oferese gratuitu no apartementu inklui viza ba ema importante iha Timor-Leste atu partisipa iha eventu ne’e.

Área ba espozisasaun ne’e kuaze ektare 438 iha Dubai Exhibition Center no sei partisipa husi nasaun 192 inklui Timor-Leste.

Antes ne’e, Governu Timor-Leste deside aloka orsamentu millaun $2,1 hodi partisipa eventu mundiál ne’e.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here