Representante UNICEF iha Timor Leste entrega Fasilidade ekipamentu ba Jestor iha Merkadu Manleuana hodi komunidade sira uja prevene COVID 19. Imajen/Antonio Goncalves

DILI, 05 agostu 2020 (TATOLI)–Xefe Ekipa Task Force Servisu Água no Saneamentu (SAS) ba kombate COVID-19, Francisco Afonso, informa segunda semana oin (10/08/2020) ekipa task force SAS sei lori profil 15 ba komunidade Rejiaun Administrativa Espesiál Oé-Cusse Ambeno (RAEOA).

Notísia Relevante: Komunidade seidauk iha konsiénsia utiliza fasilidade prevensaun COVID-19

“Semana oin, ita sei lori profil bee nian ba ita-nia komunidade sira iha RAEOA hodi ajuda komunidade hodi fase-liman no kombate ba moras COVID-19,” dehn Xefe Ekipa Task Force Servisu Água no Saneamentu (SAS) ba Kombate COVID-19, Francisco Afonso, ba Agência TATOLI iha nia knaar fatin Colmera, Dili, kuarta ne’e.

Daudaun ne’e, nia hateten, ekipa task force SAS daudauk ne’e preparadu ona atu lori profil ne’e ba RAEOA maibé depende ba ró tanba bainhra ró halai ona mak profil hirak ne’e sei to’o iha RAEOA.

“Ró la halai entaun ita sei hein. Tanba, ita presiza ró mak foin tula profil ba RAEOA,” nia dehan. 

Nia haktuir, durante Estadu Emerjénsia dala tolu (3) tutuir malu Governu seidauk ajuda profil ba RAEOA tanba laiha karta ka proposta hosi autoridade hodi husu apoiu fasilidade prevensaun nian.

“Tanba ne’e, mak durante ne’e ita apoiu de’it mak munisípiu sira seluk. Tanba ema-nia autoridade sira haruka proposta mai iha ita-nia Governu sentrál mak hafoin ekipa task force SAS monta tanke no torneira ba sira,” nia akresenta.

Francisco Afonso hatutan, servisu ekipa task force SAS nian mak bazea ba proposta hosi autoridade sira katak presiza profil hira no tau iha ne’ebé-ne’ebé.

Tuir nia, iha munisípiu Aileu ekipa task force monta ona profil rua (2), Ainaro haat (4), Baucau neen (6), Bobonaro 15, Covalima 10, Dili 40, Ermera haat (4), Liquiça haat (4), Lospalos rua (2), Manatuto tolu (3), Suai haat (4) no Viqueque haat (4).

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here