Vise-Ministru Interiór, António Armindo, hamutuk ho Ministra Saúde, Odete Maria Freitas Belo, observa kuarentena Mota-ain, kuarta (05/08). Imajen/Mídia VMI

DILI, 05 agostu 2020 (TATOLI)-Vise-Ministru Interiór (VMI), António Armindo, hamutuk ho Ministra Saúde (MS), Odete Maria Freitas Belo observa direta fatin kuarentena iha Mota-ain, Postu Administrativu Batugade, Munisípiu Bobonaro.

“Ami mai observa direta fatin kuarantena ne’ebé estabelese iha Mota-ain, amk haree katak fatin ne’e ladún sufisiente hodi akomoda ema barak liu na’in-70. Tanba ne’e sei koordena ho parte lojíztika atu hadi’a tán infraestrura balun liuliu sanitária nian,” relata Ministra Odete, hanesan haktuir iha nota imprensa ne’ebé Agência Tatoli asesu, kuarta ne’e.

Relasiona ho surtu COVID-19 iha Timor-Leste, MS kontinua alerta ba komunidade atu mantein nafatin vijilánsia saúde no mós prontu responde ho apropriadu tuir dezenvolvimentu situasaun.

“Hein katak semana oin ami hadi’a ona fatin ne’e, liuliu lojíztika nian,” nia akresenta.

Governante ne’e informa, hainhira ema tama hosi fronteira ho kuantidade boot maka sei transporta balun ba fatin kuarentena ne’ebé mak Governu liuhosi MS prepara ona.

Fatin hanesan, Vise-Ministru Interiór, António Armindo, kompromete sei koordena nafatin ho MS hodi halo monitorizasaun iha área sira ne’ebé bain-bain ema ultrapasa mai área Timór.

“Ita nafatin serbisu hamutuk ho Ministériu Saúde hodi akompanña evolusaun situasaun, atu garante serbisu prevensaun COVID-19 di’ak liután. Ministeriu Interiór liuhosi Diresaun Jerál Servisu Migrasaun no Polísia Nasionál Timor-Leste (PNTL), Unidade Patrullamentu Fronteira (UPF) sei nafatin serbisu hamutuk ho ekipa vijilánsia Ministeriu Saúde hodi kontinua halo monitorizasaun liuhosi triajen no rastreiu iha fatin tama sira hanesan aeroportu, portu no fronteira rai-maran,” dehan António Armindo.

Tanba ne’e, governante ne’e husu ba populasaun hotu atu mantein kalma no labele pániku tanba Governu sei tau hamutuk esforsu Estadu no parseiru sira hotu hodi nafatin halo prevensaun iha Timor-Leste.

Iha vizita ne’e akompaña mós husi komandante UPF, Superentendente Polísia, João Sancho Pires no Komandante PNTL Munisípiu Bobonaro.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here