Traballadór no estudante hosi Korea Súl to’o iha Aeroportu Comoro, Dili, kuarta (05/08). Imajen Tatoli/António Gonçalves

DILI, 05 agostu 2020 (TATOLI)Aviaun Citilink ne’ebé lori traballadór timor-oan na’in-114 hosi Korea Súl, to’o iha Aeroportu Internasionál Prezidente Nicolau Lobato, Comoro, maizumenus tuku 14:00.

“Totál traballadór ne’ebé fila mai Timór hosi Korea Súl hamutuk na’in-114 inklui funsionáriu Sekretaria Estadu Formasaun Profisionál no Empregu (SEFOPE), ne’ebé ita haruka ba Bali  na’in-10, tanba ne’e totál pasajeiru hamutuk na’in-124,” informa Diretór Jerál Empregu Esteriór, Paulo Alves, iha Aeroportu Comoro, kuarta ne’e.

Diretór Jerál ne’e hateten, iha aviaun ne’e inklui mós mate isin hamutuk rua, ida hosi Korea Súl no ida hosi Inglatera.

Iha mós traballadór hamutuk na’in-ualu ne’ebé ohin hosi Austrália mai Timor-Leste ho Aviaun Airnorth.

Pasajeiru hosi Inglatera hamutuk na’in-sia no estudante timor-oan hosi Indonézia hamutuk na’in-10, nune’e mós iha estudante hosi Estadu Unidu Amérika (EUA), Malázia, Singapura.

“Sira ne’ebé ohin foin mai, tenke kumpre konfinamentu obrigatóriu,” nia akresenta.

Governu prepara ona fatin haat hodi kumpre konfinamentu obrigatóriu hanesan Otel Luz Clarita, SK Hotel iha Matiaut, Novo Horizonte  Metiaut, no Sonty iha estádiu Munisipál Dili nia oin.

“Sira na’in-ualu hosi Austrália maka sei hela iha Otel Luz Clarita, traballadór hosi Korea Súl tanba barak entaun ita fahe ba ótel tolu maka henesan SK Hotel, Novo Horizonte no Sonty,” nia akresenta.

Tuir Paulo Alves, sira-nia fatin hodi kumpre konfinamentu obrigatóriu preparadu ona no parte SEFOPE halo ona kordenasaun ho liña ministeriál sira kona ba kestaun ne’e.

Kona-ba kustu aluga aviaun husi Korea Súl mai Timor-Leste hamutuk $149.000 no atu selu ótel hodi halo konfimamentu durante loron-14, hahan no aluga trasporte hodi trasporta sira ba otel sira maka besik $70.000.

“Kuandu sira sira kumpre ona kuarentena no atu sai, sira sei halo ezame laboratóriu filafali,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here