Membru Komisaun A Parlamentu Nasionál, Deputada Carmelita Caetano Moniz. Imajen/Tatoli Egas Cristovao.

DILI, 04 agostu 2020 (TATOLI)—Deputada Carmelita Caetano Monis, hateten Timor-Leste hetan susesu bo’ot hosi nia Konstituisaun Repúblika Timor-Leste (KRDTL) tanba prinsípiu konstituinionál sira ne’ebé hakruuk ba prinsípiu internasional sira, ida-ne’e konsidera hanesan susesu ida maibé parte seluk sei enferenta dezafiu implementasaun hosi órgaun soberania sira.

“Maske ita-nia konstituiaun no lei sira defende no garante katak Timor-Leste hanesan Estadu Direitu Demokrátiku no ida-ne’e ita bele konsidera hanesan susesu ida ba ita. Maibé iha parte seluk ita sei enfrenta nafatin dezafiu lubuk ida iha ita-nia faze implementasaun hahú kedas órgaun soberania sira,” dehan Carmelita Caetano Monis liuhosi nia aprezentasaun bainhira sai oradora iha diskusaun meza redonda ho topiku “Analiza Kritiku ba Implementasaun Estadu Direitu Demokrátiku hosi Perspetiva Legál” iha Salaun Pos Graduasaun UNPAZ, Osindo, Dili, tersa ne’e.

Reprezentante povu ne’e hateten, Timor-Leste sei enfrenta dezafiu boot tanba realidade Timor-Leste iha faze konstrusaun ne’ebé sei iha faze frajilidade tanba instituisaun sira hotu mesak menus rekursu umanu.

“Realidade ita sei iha faze konstrusaun Estadu. Dezafiu boot ida-ne’ebé maka ita sei enfrenta mak frajilidade hosi ita-nia instituisaun sira, ita-nia rekursu umanu sei menus no sei iha faze preparasaun ne’ebé maka ladún másimu. Ita-nia administrasaun sei kontinua todan no burokrásia ne’ebé difikulta sidadaun sira-nia vida. Ita-nia Tribunál sei kontinua ho falta rekursu umanu,” nia hateten.

Atu garante justisa ne’ebé kredivel no justu ba sidaddaun hotu, nia informa, falta rekursu umanu  iha tribunál ne’e sei prejudika justisa tanba prosesu kazu pendente sei barak no tempu mós naruk demais halo sidadaun sira dezanimadu ka lakon pasiénsia tanba hein kleur atu hetan justisa no dala ruma tenke sidadaun balu nia vida hakotu tiha maibé nia prosesu seidauk iha desizaun hosi tribunál.

“Maske ita hanesan Estadu Direitu Demokratiku maibé ita-nia instituisaun balu sei fraku halo ita-nia situasaun ladún favoravél nafatin no ida-ne’e fó tebes impaktu ba sidadaun nia moris tanba ladún hetan benefísiu,” nia dehan.

Entretanu, nia dehan, pior liután iha violasaun ba prinsípiu Estadu Diretu Demoktratiku liuhosi órgaun soberanu no falta kontrolu hosi órgaun soberania tribunál ba violasaun hirak ne’e.

Ezemplu, tuir nia, moris iha estadu demokrátiku signifika katak órgaun soberánia ida-idak respeita prinsípiu separasaun no interdepedénsia ba poder.

Signifika, nia hateten, orgaun soberánia sira tenke hatene no kle’an katak nia knaar ka podér ne’ebé maka konstituisaun fó to’o iha ne’ebé, labele halo intervensaun órgaun seluk nia poder hodi haksoit liu tiha Konstituisaun Repúblika Demokrátika Timor-Leste.

“Moris iha estadu demokratiku ida maka ita koko no komete violasaun ba prinsípiu konstituisionál sira-nia impaktu boot tebes ba prosesu dezenvolvimentu demokrátiku no mós dezenvolvimentu nasaun nian, nia finalidade maka fó impaktu ba ekonómia nasaun no mós ba povu rasik,” nia dehan.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here