Reprezentante WFP iha Timor-Leste, Dangen Liu. Imajen/Espesiál

DILI, 05 agostu 2020 (TATOLI)-Servisu umanitáriu aéreu hosi Programa Ai-han Mundiál (WFP, sigla inglés) iha kuarta ne’e transporta tan máskara doasaun hosi Alibaba Foundation hamutuk 470.000 iha kaixa 57 no pasajeiru hamutuk 61 ho Malaysia Airlines.

Servisu aéreu ho destinasaun Kuala Lumpur-Dili ne’e, to’o iha Aeroportu Internasionál Prezidente Nicolau Lobato, Comoro iha tuku 15.30 lorokraik, hafoin tula fali pasajeiru 30 hosi Dili ba Kuala Lumpur.

“Voo Malaysia Airlines ho ligasaun aéreu ba Timor-Leste semana rua dala ida no voo ida ohin importante. Ohin aviaun ne’e lori pasajeiru hamutuk na’in-61 no ekipamentu hanesan máskara,” tenik Reprezentante WFP iha Timor-Leste, Dangen Liu ba Agência Tatoli, iha Aeroportu Comoro.

Nia dehan, máskara ho tipu N porsentu 95 ne’e uza hodi halo prevensaun COVID-19 no máskara ne’e maka bain-bain doutór sira uza hodi halo operasaun.

“Máskara doasaun sira ne’e entrega ba Governu Timor-Leste liuhosi Ministériu Saúde, nune’e karik populasaun ka institusaun Governu sira presiza bele fahe hodi bele proteje-an hosi COVID-19,” nia akresenta.

Aviaun ne’ebé tula ekipamentu no pasajeiru aluga hosi WFP, nu’udar ajuda umanitáriu ne’ebé oferese ba nasaun afetadu COVID-19.

Aleinde ne’e, sei iha tan voo iha loron 19 agostu ne’ebé sei transporta oxijéniu.

Enkuantu kona-ba pasajeiru na’in-61 ne’e hosi organizasaun oin-oin hanesan Peace Corps, Embaixada Korea Súl, Programa Nasaun Unida ba Dezenvolvimentu (PNUD), Ministériu Negósiu Estranjeiru no Kooperasaun (MNEK), Banku Mundiál, Fundu Nasaun Unida ba Atividade Populasionál (UNFPA), Instituto Camões, Care International, Mercy Corps, Pladium Internasionál, Catholic Realief Service (CRS) no Uniaun Europeia.

Nune’e mós, pasajeiru na’in-31 ne’ebé sei  transporta hosi Dili ba Kuala Lumpur maioria estrajeiru ne’ebé serbisu fó asesoria ba instituisaun Governu no hosi organizasaun internasionál iha Timor-Leste.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here