Prezidente Repúblika, Francisco Guterres Lú Olo. Imajen Tatoli/António Goncalves

DILI, 05 agostu 2020 (TATOLI)—Prezidente-Repúblika (PR), Francisco Guterres “Lú Olo” husu tau atensaun pontu entrada ba territóriu nasionál hodi bele hasees-aan hosi risku propagasaun surtu COVID-19.

Notísia Relevante: PN autoriza PR Lú Olo dekreta tan EE

Hafoin rona hanoin favorável hosi membru sira hosi Konsellu Superiór Defeza no Seguransa no Konsellu Estadu, Prezidente Repúblika, Francisco Guterres Lú Olo, ohin,  haruka mensajen ba Parlamentu  Nasional hodi  husu autorizasaun atu halo deklarasaun ba estadu emerjénsia.

Iha mensájen ne’ebé diriji ba Parlamentu Nasionál, Prezidente Repúblika informa katak iha períodu naruk ida nia laran, iha territóriu nasionál la rejista kazu COVID-19 maibé ida ne’e la signfika Timor-Leste livre ona hosi risku ka perigu.

Liuhosi komunikadu imprensa ne’ebé Agência TATOLI asesu, ohin, Xefe Estadu fundamenta situasaun interna  ohin loron iha rai-laran  la ejize medida restritiva ne’ebé forte hanesan períodu estadu emerjénsia datoluk liubá.

Tanba ne’e, Estadu Emerjénsia foun ida-ne’e sei parsialmente suspende no limita direitu ba sirkulasaun internasionál, liberdade sirkulasaun no fixasaun residénsia iha territóriu nasionál no mós direitu ba rezisténsia.

“Prezidente Repúblika husu atu tau atensaun espesiál ba pontu entrada ba territóriu nasionál atu ita bele  hasees-aan  hosi risku  Coronavírus (COVID-19) tama tan iha ita-nia rain. Sidadaun sira-ne’ebé tama iha Timor-Leste tenke submete ba kuarentena, katak  sei  moris ketak  iha fatin ida durante loron sanulu resin haat (14),” Xefe Estadu hateten.

Iha komunikadu ne’e subliña, ba estadu emerjénsia ida-ne’e atividade ekonómika, sosiál, kulturál, eskolár, serbisu, halimar, vizita família, toka no kanta sei la’o hanesan bainbain maibé tenke haktuir prátika fase-liman beibeik, uza máskara no distansiamentu sosiál atu idak-idak bele hasees-aan hosi moras COVID-19 no karik moras la hada’et ba ema seluk.

Prezidente Repúblika hateten, lisaun prinsipál ida-ne’ebé aprende iha luta kontra Coronavirus (COVID-19) mak unidade hosi ema hotu-hotu, feto, mane, foin-sa’e ka lae, sidadaun nasional ka estranjeiru.

Hotu-hotu iha responsabilidade atu kumpre ninia devér ba Povu Timor-Leste no ba umanidade tomak liuhosi kontribuisaun ema hotu nian mak Timor-Leste bele manán dezafiu ida-ne’e.

“Ita sei hasoru nafatin risku tanba númeru kazu moras aumenta iha Repúblika Indonézia, partikularmente iha provínsia ne’ebé Timor-Leste fahe nia fronteira internasionál terrestre no mós iha  ita-nia país viziñu, Austrália. Horseik, Iha 04 agostu, Timor-Leste rejista kazu pozitivu foun ida hosi sidadaun ida-ne’ebé tama mai territóriu nasionál hosi fronteira terrestre,” komunikadu imprensa ne’e hateten.

Ohin lokraik, Komisaun Permanente Parlamentu Nasional aprova pedidu autorizasaun hosi Prezidente Repúblika hodi dekreta Estadu Emerjénsia.

Liuhosi Dekretu Presidensial ho data 5 agostu 2020, Prezidente Repúblika deklara estadu emerjénsia  ba loron-30,  hahú hosi tuku 00.00 iha 6 agostu 2020 (kinta feira) no remata iha tuku 23.59 iha 4 setembru 2020 (sesta feira).

Jornalista : Evaristo Soares Martins

Editór      :  Cancio Ximenes

HAKEREK NO HATÁN

Please enter your comment!
Please enter your name here